ՄԱԿ-ում կանխատեսել են վերջին 75 տարվա մարդասիրական ամենածանր ճգնաժամը՝ 2021թ.

ՄԱԿ-ի Պարենի համաշխարհային ծրագրի (ՊՀԾ) ղեկավար Դևիդ Բիզլին հայտարարել է, որ 2021թ. աշխարհը կարող է բախվել վերջին 75 տարվա ամենածանր մարդասիրական ճգնաժամին:

Նրա խոսքով՝ վերջին 4 տարիներին (հիմնականում՝ զինված հակամարտությունների պատճառով) սովամահության եզրին կանգնած մարդկանց թիվն աճել է՝ 80 մլն-ից հասնելով 135 մլն-ի: Համավարակի պատճառով այդ թիվը հասել է 270 մլն-ի:

Բիզլին նշել է, որ, հաշվի առնելով այս ցուցանիշերը, ինչպես կանխատեսվում է, հաջորդ տարին «բառացիորեն աղետալի է» լինելու. 2021թ.-ը մարդասիրական լրջագույն ճգնաժամի տարի է լինելու, ինչպիսին չի գրանցվել ՄԱԿ-ի հիմնադրումից ի վեր:

Միևնույն ժամանակ Բիզլին շեշտել է, որ եթե հաջողվի հավաքել բավարար միջոցներ, ապա կհաջողվի կանխել ապակայունացումը, սովը և արտագաղթը:

Հավելենք, որ Միավորված ազգերի կազմակերպության գլխավոր քարտուղար Անտոնիո Գուտերեշի համոզմամբ՝ հակամարտությունները, կլիմայական փոփոխությունը և կորոնավիրուսը Երկրորդ համաշխարհային պատերազմից հետո նոր, հսկայական մարդասիրական մարտահրավերներ են ստեղծել: