Հնդկաստանում կապիկները բժշկական քոլեջից հափշտակել են Covid-19-ով վարակվածների արյան նմուշները
«Ավազակախմբի» անդամներից մեկը բարձրացել է ծառի վրա և փորձել է ուտել գողացված նմուշը: Բնակիչներն անհանգստացել են, որ դա կարող է կորոնավիրուսի տարածման պատճառ հանդիսանալ, սակայն կապիկների վարակվածության վերաբերյալ տեղեկություններ բժիշկները դեռ չունեն:
Կապիկները մուտք են գործել Հնդկաստանի Մեերութի քոլեջի լաբորատորիա, հարձակվել են աշխատակիցների վրա և հափշտակել են Covid-19-ով վարակված պացիենտների արյան 3 նմուշներ:
Դրանից հետո կապիկները փախել են՝ բարձրանալով ծառերի վրա, իսկ նրանցից մեկը փորձել է ուտել «որսը»: Լաբորատորիայի ղեկավար Դիրաջ Ռաջը պատմել է, որ ավելի ուշ մյուս նմուշները հայտնաբերվել են, վնասված չեն եղել: Նրա կարծիքով՝ վարակման և տարածման հավանականություն չկա:
Քոլեջի հարևանությամբ բնակվողներն անհանգստացել են, որ այդ երևույթը կարող է Covid-19-ի հետագա տարածման պատճառ դառնալ: Սակայն բժիշկներին հայտնի չէ՝ կապիկները կարո՞ղ են կորոնավիրուսով վարակվել՝ դիպչելով վարակվածի արյանը:
Ջոնս Հոփկինսի համալսարանի տվյալներով՝ Հնդկաստանում արձանագրվել է կորոնավիրուսով վարակվածության 169 հազար դեպք: Մահացել են 4,8 հազարը: Պաշտոնական տվյալներով՝ մայիսի 29-ին Հնդկաստանում կորոնավիրուսից մեկ օրվա ընթացքում մահացությունների թիվը (175) գերազանցել է հարևան Չինաստանում գրանցված թվին:
Մեկնաբանությունները