Հայաստանում մինչ օրս Covid-19-ի բրիտանական և հարավաֆրիկյան շտամմեր չեն թեստավորում — Շեշտ.am (shesht.am)
3 րոպե
Խմբագրություն

Հայաստանում մինչ օրս Covid-19-ի բրիտանական և հարավաֆրիկյան շտամմեր չեն թեստավորում

Covid-19-ի բրիտանական շտամմն արդեն տարածված է աշխարհի 106 երկրներում, հարավաֆրիկյանը` 56: Հայաստանում դրանց տարածվածության վերաբերյալ տեղեկություն չկա, քանի որ այստեղ այդ շտամմերի թեստավորում չի կատարվում, ուստիև դրանց նկատմամբ վերահսկողություն չի կարող կատարվել:

Շտապօգնություն / © Photolur

ՀՀ հիվանդությունների վերահսկման և կանխարգելման ազգային կենտրոնից տեղեկացանք, որ Հայաստանում դեռևս նոր տեսակի կորոնավիրուսի բրիտանական և հարավաֆրիկյան շտամմերի թեստավորում չի իրականացվում:

Նշենք, որ կորոնավիրուսի «չինական» տարբերակի համեմատ բրիտանականի դեպքում հոտառության կորուստն աննշան է, սակայն տարբերվող ախտանշաններ են` գերթուլությունը, կոկորդի ու մկանների ցավը: Ընդհանրություններից են` բարձր ջերմությունը, մշտական հազը և համի զգացողության փոփոխությունը:

Բրիտանական շտամմն առաջին անգամ հայտնաբերվել է 2020թ. սեպտեմբերին: Այն, ի տարբերություն «չինականի», կարող է ավելի արագ տարածվել: Նորահայտ տեսակը գրանցվել է Մեծ Բրիտանիայի տարբեր շրջաններում, ինչի հետևանքով սահմանափակումներն ավելի են խստացվել:

Ենթադրվում է, որ նոր շտամմն առավել մահաբեր է, սակայն գիտական հիմնավորում դեռևս առկա չէ: Հիշեցնենք, որ ըստ պաշտոնական տեղեկատվության` բրիտանական շտամմով վարակվել և Լոնդոնում բուժում է ստացել նաև ՀՀ նախագահ Արմեն Սարգսյանը:

2020թ. դեկտեմբերին ի հայտ է եկել մեկ այլ շտամմ` հարավաֆրիկյանը, որը, որոշ աղբյուրների հաղորդմամբ, ավելի վտանգավոր կարող է լինել, քան բրիտանականը, սակայն, Հարավաֆրիկյան Հանրապետության բարձրագույն կրթության, գիտության և տեխնոլոգիաների նախարարի խոսքով, այն մարդու մոտ ամուր իմունիտետ է առաջացնում:

Հավելենք, որ աշխարհում շարունակում են արագորեն տարածվել նաև այլ տարատեսակներ` բրազիլականը, իտալականը, շվեդականը և այլն, սակայն բրիտանականն ու հարավաֆրիկյանն ամենատարածվածն են. Covid-19-ի բրիտանական շտամմն արդեն տարածված է աշխարհի 106 երկրներում, հարավաֆրիկյանը` 56:

Ամենաընթերցվածը

[miniorange_social_login]

Մեկնաբանությունները

Գրել մեկնաբանություն
Հաստատեք
Մուտք գործեք
Մուտք գործելով Դուք համաձայնվում եք կայքի օգտագործման օրենքների հետ.