Եղվարդի Armoil նավթավերամշակման գործարանը չի բացվի
Գործարարը նշել է, որ արդեն ներդրել է 23 մլն դոլար, նախատեսել է 30 մլն ներդնել, ստեղծել 300 աշխատատեղ 250 հազար դրամ աշխատավարձով: Սակայն այժմ խոստացել է, որ այլևս երբեք չի վերադառնալու գործարանի հարցին:
Իրանցի գործարար Հենրիխ Դեր Ղուկասյանը հայտարարել է, որ Հայաստանում «նստած են ինչ-որ սատանայական խմբեր, ովքեր խոչընդոտում են ներդրումներին»: Գործարարը բիտումի և տարատեսակ յուղերի արտադրության գործարանի կառուցման թույլտվությունը ստացել է դեռ հեղափոխությունից առաջ: Հաղորդվում է, որ հեղափոխությունից հետո նույնպես թույլտվություն է ստացել: Սակայն շուտով խնդիրներ են ծագել տեղի գործարարների հետ, ովքեր հարևանությամբ մրգերի այգիներ ունեն: Դժգոհել են նաև տարածքին մոտ բնակվող քաղաքացիները:
Այգետերերը պահանջել են դադարեցնել աշխատանքները կամ առաջարկել են գնել իրենց այգիները: Հենրիխ Դեր Ղուկասյանը հայտարարել է, որ գործարանը գտնվում է Եղվարդի արդյունաբերական գոտում և կիրառելու է ամենաժամանակակից սարքավորումները` առանց թափոնների: Տեղի բնակիչները գործարարից պահանջել են իրենց բնակարանները գնել 200 հազար դոլարով, ինչը, գործարարի խոսքով, 5-10 անգամ գերազանցում է շուկայական գինը:
Գործարարը նշել է, որ արդեն ներդրել է 23 մլն դոլար, նախատեսել է 30 մլն ներդնել, ստեղծել 300 աշխատատեղ 250 հազար դրամ աշխատավարձով: Սակայն այժմ խոստացել է, որ այլևս երբեք չի վերադառնալու գործարանի հարցին:
Դեր Ղուկասյանի խոսքով` լինելով հայ` հայրենիքի համար արել է ամեն ինչ, սակայն չի հաջողվել և հիմա հասկանում է, որ չպետք է ստացվեր: Իրանցի գործարարը նաև բարեգործ է: Նա նավթավերամշակման գործարաններ ունի Իրանում, ԱՄԷ-ում և այլ երկրներում: Հաղորդվում է, որ Արցախի զարգացման համար միլիոնավոր դոլարներ է հատկացրել:
Մեկնաբանությունները