Քրիստոնյա աղվաններն Ադրբեջանի դրոշով մտել են Սուրբ Խաչ եկեղեցի

«Կովկասի քրիստոնյա ուդի-աղվանների համայնքի» ներկայացուցիչներն այցելել են Վանա լճի Աղթամար կղզու Սուրբ Խաչ եկեղեցի՝ հայտարարելով, որ իրենք այդ եկեղեցի այցելելու իրավունքն ունեն: Նրանք եկեղեցի են մտել թուրքական և ադրբեջանական դրոշներով, կատարել են կրոնական ծես:

Ադրբեջանաբնակ «ուխտավորները» հայտարարել են, թե Աղթամար կղզու եկեղեցին կառուցել են քրիստոնյա աղվանները: Նրանք դիմել են Թուրքիայի ղեկավարությանը՝ եկեղեցում ծիսական արարողություններ կատարելու թույլտվության համար:

Աղթամար կղզում գտնվող Սուրբ Խաչը վաղմիջնադարյան հայկական եկեղեցի է, կառուցվել է 915-921թթ.: 2010թ. սեպտեմբերի 19-ին, 95 տարվա ընդմիջումից հետո, եկեղեցում սուրբ պատարագ է մատուցվել: Նույն տարում եկեղեցու գմբեթին նաև խաչ է տեղադրվել: Հաղորդվում է, որ 2011-ին նույնպես պատարագ է մատուցվել:

Ավելի վաղ հաղորդվել էր, որ տարբեր երկրներից ժամանած զբոսաշրջիկներին արգելվել էր սուրբ պատարագի ժամանակ եկեղեցի մտնել Հայաստանի դրոշով: