Fake: Ապրիլին կարող է Երկրի վրա աստղակերպ ընկնել
Հայկական և արտասահմանյան մամուլում տեղեկություններ են տարածվել, թե ապրիլի վերջին մեր մոլորակի վրա աստղակերպ է ընկնելու: Կորոնավիրուսի մասին լուրերին զուգահեռ՝ սա կարող է հերթական վտանգը դիտվել մարդկության համար: Սակայն, իրականում, աստղակերպը Երկրին չի դիպչելու:
Կորոնավիրուսի վերաբերյալ տարածվող լուրերին զուգահեռ վերջին օրերին մամուլում տեղեկություններ են տարածվել, որ Երկիր մոլորակին աստղակերպ է մոտենում, որը, հնարավոր է, ապրիլի վերջերին ընկնի Երկրի վրա: Այդ մասին տեղեկությունները տարածվել են ինչպես արտասահմանյան, այնպես էլ հայկական տիրույթում:
Թեև NASA-ն 1998 OR2 աստղակերպը պաշտոնապես դասակարգել է որպես «պոտենցիալ վտանգավոր», սակայն դրա թռիչքի հեռավորությունը մարդկության համար լիարժեք անվտանգ է լինելու: Վտանգավորների շարքում ներառելով՝ NASA-ն ցանկացել է պարզապես ցույց տալ, որ օբյեկտը համապատասխանում է տիեզերական գործակալության դասակարգման համակարգի որոշակի չափանիշներին:
NASA-յի կարծիքով՝ աստղակերպերը համարվում են «պոտենցիալ վտանգավոր» այն դեպքում, երբ նրանց ուղեծիրը մեր մոլորակի ուղեծիրը հատի 7,5 մլն կիլոմետր հեռավորությամբ: Սակայն 1998 OR2 աստղակերպն անցնելու է 6,3 մլն կիլոմետր բարձրությամբ: Այնպես որ՝ NASA-յի չափանիշներով այն իսկապես վտանգավոր է, սակայն բավարար հեռավորությամբ անցնող ուղեգծի շնորհիվ մարդկությանը վտանգ չի սպառնում:
Մեկնաբանությունները