Ի՞նչ կլինի, եթե Covid-19-ին ավելանան նաև սեզոնային գրիպն ու մրսածությունը — Շեշտ.am (shesht.am)
5 րոպե
Խմբագրություն

Ի՞նչ կլինի, եթե Covid-19-ին ավելանան նաև սեզոնային գրիպն ու մրսածությունը

Մասնագետները հատկապես այս պարագայում կարևոր են համարում գրիպի դեմ պատվաստվելը: Իսկ որոշ այլ գիտնականներ շարունակում են պնդել կորոնավիրուսի «տիեզերական ծագումը»:

Պատվաստում / © Zdravcity

Կորոնավիրուսի համեմատությամբ շնչառական վարակներն այնքան էլ վտանգավոր չեն թվում: Սակայն շուտով եղանակը կցրտի, և աշնանը, հնարավոր է, նոր անհարմարությունների առաջ կանգնի աշխարհը:

Ուշագրավ է, որ Հարավային կիսագնդում գարնանը, երբ այնտեղ աշնանային եղանակ էր, գրիպով հիվանդացության կտրուկ նվազում է գրանցվել: Պատճառներ են նշվում քիչ ճամփորդությունները, փակ դպրոցները, հակահամաճարակային կանոնների պահպանումը, այդ թվում՝ դիմակ կրելը:

Սակայն, միևնույն ժամանակ, գիտնականներին հայտնի չէ, թե ինչպես SARS-CoV-2-ը կազդի մյուս շնչառական վիրուսների տարածման և դրանց առաջացրած հիվանդության ընթացքի վրա: Փոքրիկ հետազոտությունը ցույց է տվել, որ միաժամանակ երկու վիրուսով վարակվածությունը չի փոխում Covid-19-ի ընթացքը, սակայն վստահ եզրակացնելու համար դա բավարար չէ:

Գրիպով քիչ հիվանդանալն իր հերթին նոր խնդիր է առաջացրել: Գիտնականները դժվարությամբ են կանխատեսում, թե որ շտամմերը կգերակշռեն առաջիկա սեզոնին, ուստի բարդ է պատվաստանյութի հարցը:

ԱՄՆ-ի օրինակը

ԱՄՆ-ի բազմաթիվ շրջաններում կորոնավիրուսը մեծ թափով է տարածվում: Նշվում է, որ եթե դրան ավելանա նաև գրիպը, ապա առողջապահական համակարգը կաթվածահար կլինի:

Գրիպի և Covid-19-ի ծանր դեպքերում ախտանշանները նման են. բուժման համար նույն սարքավորումներն են անհրաժեշտ, սակայն դեղամիջոցները տարբեր են: Այս դեպքում հիվանդությունը տարանջատելը բարդ է լինելու:

Գրիպի թեստերը նույն կառուցվածքն ունեն, ինչ՝ կորոնավիրուսինը: Նշանակում է՝ մեծանալու է լաբորատորիաների ծանրաբեռնվածությունը: Թեև ԱՄՆ-ում թույլատրվել է երկու վիրուսների կոմբինացված թեստավորումը, սակայն այն ամենուր չի կարող կիրառվել:

Հաղորդվում է, որ գրիպի դեմ պատվաստանյութը կլուծեր այդ խնդիրը: Սակայն եթե սովորական իրավիճակում ոչ բոլորն էին դիմում պատվաստման, ապա այժմ դա իրականացնելն առավել բարդ է: Այստեղ տեխնիկական խնդիրներից բացի առկա է նաև կոնսպիրոլոգիական մոտեցումների խոչընդոտը:

Կորոնավիրուսը՝ տիեզերքի՞ց

SARS-CoV-2-ի ծագման թեմային անդրադարձել ենք: Միջազգային մամուլում տարածվող հիմնական կարծիքներն են՝ արհեստական (որպես զենք) ծագումը և 5G ցանցը: Որոշ գիտնականներ ենթադրել են, որ տիեզերական ծագում ունի. Երկրի վրա է թափվել 2019թ. հոկտեմբերի 11-ին Չինաստանի արևելքում հայտնված երկնաքարից:

Թեև այս վարկածն ապացուցված չէ, սակայն հեղինակներն այն նույնացնում են գիսավորների ու աստղակերպերի միջոցով Երկրի վրա կյանքի առաջացման տեսության հետ:

Նույն գաղափարի հեղինակ գիտնականների համոզմամբ՝ կորոնավիրուսը մարդուց մարդուն չի փոխանցվում, այն պարզապես մինչև մթնոլորտ հասնելը փշրված երկնաքարի բեկորների հետ տարածվել է Երկրի վրա՝ մեծ տարածությամբ: Փետրվարին նույն գիտնականները հայտնել էին, որ պատվաստանյութն անիմաստ ծախս է, քանի որ փոշին տարածվելուց հետո վիրուսն անհետանալու է:

Ամենաընթերցվածը

[miniorange_social_login]

Մեկնաբանությունները

Գրել մեկնաբանություն
Հաստատեք
Մուտք գործեք
Մուտք գործելով Դուք համաձայնվում եք կայքի օգտագործման օրենքների հետ.