Ապացուցվել է, որ շները կարող են մարդուց վարակվել կորոնավիրուսով — Շեշտ.am (shesht.am)
5 րոպե
Խմբագրություն

Ապացուցվել է, որ շները կարող են մարդուց վարակվել կորոնավիրուսով

Գիտնականները Covid-19-ով վարակված մարդկանց խորհուրդ են տալիս ընտանի կենդանիներին խնամել բացառապես դիմակներով, իսկ հնարավորության դեպքում՝ նաև սահմանափակել անմիջական շփումը:

Խորհուրդ է տրվում կենդանիներին խնամել դիմակներով / © mos.ru

Առաջին երկու շները, որոնց մոտ կորոնավիրուս է ախտորոշվել, պոմերանյան շպիցն ու գերմանական հովվաշունն են: Նրանք ամենայն հավանականությամբ վարակվել են իրենց տերերից: Շների մոտ հայտնաբերվել են վիրուսային ՌՆԹ և SARS-CoV-2-ի հակամարմիններ: Բացի այդ` շներից մեկի մոտ դեռևս կենդանի վիրուս է շրջանառվել: Հետազոտությունն իրականացրել են Հոնկոնգի համալսարանի համաճարակաբանները:

Շների մոտ վիրուսային գենետիկական հաջորդականության ուսումնասիրությունը ցույց է տվել, որ նրանք նույնական են մարդու մոտ հայտնաբերվածների հետ: Գենետիկական նման կապը վստահաբար հաստատում է տերերից կենդանիներին վարակի փոխանցման փաստը: Հետազոտությունը ցույց չի տվել ոչ մի ապացույց այն բանի, որ շները կարող են վիրուսը փոխանցել այլ կենդանիների կամ մարդկանց: Սակայն գիտնականների ձեռքի տակ տվյալները դեռևս բավարար չեն հստակեցնելու, թե որ ուղղությամբ կարող է վիրուսը տարածվել:

Նշվում է, որ մարդուց շանը վարակի փոխանցման հավանականությունը մեծ չէ: Վարակված տերերի հետ բնակվող, գիտնականների կողմից դիտարկվող 15 շներից միայն 2-ն են վարակվել SARS-CoV-2-ով: Ախտանշանները նույնպես բարդ չեն եղել: Սակայն մարդուց կենդանուն և հակառակը վարակի փոխանցման հանգամանքը պետք է հստակեցվի՝ վարակի բռնկումների կանխարգելման ու կանխատեսման համար:

Սա մարդկանց հետ շփում ունեցած կենդանիների վարակվածության առաջին դեպքը չէ: Ավելի վաղ SARS-CoV-2 վիրուս է հայտնաբերվել 3 ընտանի կատուների մոտ՝ 1-ը՝ Հոնկոնգում, 2-ը՝ ԱՄՆ-ում: Կորոնավիրուսի թեստավորման դրական արդյունք է արձանագրվել նաև Նյու Յորքի կենդանաբանական այգու 4 վագրերի ու 3 առյուծների մոտ:

Նոր տվյալները հաստատում են ապրիլին արված հետազոտության արդյունքները, երբ չինացի հետազոտողները միտումնավոր վարակել էին շներին: Գիտնականները Covid-19-ով վարակված մարդկանց խորհուրդ են տալիս ընտանի կենդանիներին խնամելիս դիմակ կրել և, հնարավորության դեպքում, սահմանափակել անմիջական շփումը:

Հետազոտողները նախատեսում են ուսումնասիրել կորոնավիրուսի փոխանցման ուղիները: Արդեն հաստատվել է, որ SARS-CoV-2-ը մարդկային պոպուլյացիայում է հայտնվել չղջիկներից, բայց բացառված չէ, որ կատուներն ու շները կարող էին փոխանցման ճանապարհին միջանկյալ օղակ հանդիսանալ. չէ՞ որ Չինաստանում այդ կենդանիների միսը սննդակարգի բավականին պահանջված բաղադրիչ է:

Գիտնականները նաև ցանկանում են հասկանալ՝ արդյո՞ք Covid-19-ի՝ մարդկանց բնորոշ ախտանշանները կարող են ի հայտ գալ նաև շների մոտ: Օրինակ, կորոնավիրուսով վարակված մարդկանց մոտ նկատվում է հոտառության կորուստ: Դա կարող է ազդել հատուկ վարժեցված շների վրա, որոնք հոտառությամբ հայտնաբերում են պայթուցիչ, թմրանյութ կամ արգելված այլ նյութեր:

Ուշագրավ է, որ մի քանի ամիս առաջ ռուսական համաճարակաբանական կենտրոնի մասնագետներից Վիկտոր Մալեևը նշել էր, որ կատուներին ու շներին մարդու համար SARS-CoV-2-ի վարակի հավանական աղբյուր չպետք է համարել: Նրա խոսքով՝ այդ կենդանիները կարող են այնպիսի կորոնավիրուսների վարակակիր լինել, որոնք մարդու համար վտանգավոր չեն:

Ամենաընթերցվածը

[miniorange_social_login]

Մեկնաբանությունները

Գրել մեկնաբանություն
Հաստատեք
Մուտք գործեք
Մուտք գործելով Դուք համաձայնվում եք կայքի օգտագործման օրենքների հետ.