ԱՀԿ-ն դադարեցրել է Թրամփի դեղամիջոցի՝ հիդրոքսիքլորոքինի փորձարկումները

Առողջապահության համաշխարհային կազմակերպությունը (ԱՀԿ) անվտանգության նկատառումներից ելնելով դադարեցրել է Covid-19-ի բուժման պոտենցիալ դեղամիջոց համարվող հիդրոքսիքլորոքինի և քլորոքինի կլինիկական փորձարկումները: Վերջերս կատարված ուսումնասիրությունը պարզել է, որ հիդրոքսիքլորոքինի կիրառումը ոչ միայն արդյունավետ չէ, այլև կարող է բարձրացնել պացիենտի մահացության հավանականությունը:

Ամբողջ աշխարհում 671 հիվանդանոցների 96 հազար պացիենտների հետազոտություն իրականացնելով՝ գիտնականները եզրակացրել են, որ քլորոքինն ու հիդրոքսիքլորոքինն ունեն սիրտ-անոթային համակարգի մոտ բարդացումներ առաջացնելու հնարավոր վտանգավորություն: Հակամալարիական դեղամիջոցն ընդունող պացիենտների մոտ նկատվել է սրտային առիթմիայի առաջացման բարձր հավանականություն:

Որոշ ժամանակ առաջ ԱՄՆ նախագահ Դոնալդ Թրամփը հայտնել էր, որ կանխարգելիչ նպատակներով ընդունում է հիդրոքսիքլորոքին, որպեսզի չվարակվի, չնայած ԱՀԿ-ի այն հայտարարությանը, որ կորոնավիրուսի դեմ պայքարում դեղամիջոցի արդյունավետության վերաբերյալ հուսալի ապացույցներ չկան:

Կիրակի օրը Թրամփը հայտարարել էր, որ ավարտել է դեղամիջոցի ընդունման երկշաբաթյա կուրսը և այլևս չի ընդունում՝ նշելով. «Ի դեպ՝ ես դեռ այստեղ եմ»: Կորոնավիրուսի դեմ դեղամիջոցների ընդունումը ողջունել է նաև Բրազիլիայի նախագահ Ժաիր Բոլսոնարուն:

ԱՀԿ-ն նախկինում զգուշավորություն էր ցուցաբերում դեղամիջոցի կլինիկական փորձարկումների հարցում, իսկ այժմ դրանք դադարեցրել է, մինչև դեղամիջոցի անվտանգության համար պատասխանատու գործադիր խումբը չհետազոտի հասանելի բոլոր նյութերը:

Միևնույն ժամանակ ԱՀԿ-ում հավելել են, որ քլորոքինը և հիդրոքսիքլորոքինը նախկինի նման անվտանգ են մալարիայի և մի շարք այլ աուտոիմունային հիվանդությունների բուժման համար:

Կողմնակի ազդեցություններ

Հիդրոքսիքլորոքին. քլորոքինի ավելի ուշ և առավել քիչ տոքսիկ տարբերակ, ունի առավել արտահայտված հակավիրուսային և հակաբորբոքային նշանակություն:

Քլորոքին. սովորաբար նշանակվում է մալարիայի, որոշ պրոտոզոյային վարակների, ռևմատոիդ արթրիտի և կարմիր գայլախտի բուժման համար:

Այս երկու դեղամիջոցներն էլ ունեն կարդիոտոքսիկ ազդեցություն և կարող են առաջացնել առիթմիա և տախիկարդիա, հատկապես սիրտ-անոթային հիվանդություններ ունեցող պացիենտների մոտ: Այդ մասին ավելի վաղ նախազգուշացրել է նաև Սննդամթերքի և դեղամիջոցների վերահսկման ամերիկյան վարչությունը (FDA)՝ կապված ամբուլատոր պայմաններում կամ կլինիկական փորձարկումների ժամանակ Covid-19-ի բուժման նպատակով այդ դեղամիջոցների կիրառման հետ:

Նախորդ շաբաթ հրապարակված հետազոտությունում նշվել է, որ դեղամիջոցի օգտագործումն առանձին կամ անտիբիոտիկների հետ մեկտեղ կարող է բարձրացնել կորոնավիրուսից մահացության վտանգը:

Գիտնականները հետազոտված պացիենտների տվյալները հետազոտել են երեք խմբերում: Առաջին խմբում հավաքվել են այն հիվանդների տվյալները, որոնց բուժել են հակամալարիական դեղամիջոցներից մեկով, երկրորդում՝ որոնց տրամադրվել է հակամալարիական դեղամիջոց՝ հակաբիոտիկների հետ: Երրորդ խումբը վերահսկողն է. պացիենտներ, որոնց դեղամիջոց չի տրվել: Արդյունքում՝ դեղամիջոցն ընդունած պացիենտների մոտ մահացության վտանգն ավելի մեծ է եղել:

Վերահսկող խմբում մահացությունը կազմել է 9,3%, դեղամիջոցն ընդունածների խմբում՝ 16-23,8% (հիդրոքսիքլորոքին՝ 18%, քլորոքին՝ 16,4%, հակաբիոտիկների հետ՝ 22,2 և 23,8%): Հակամալարիական դեղամիջոցներն ընդունածների մոտ սրտային առիթմիայի առաջացումն էականորեն բարձր է եղել:

Փորձագետներն ավելի վաղ էին կոչ արել չդիմել հակամալարիական դեղերի ինքնանշանակ և անվերահսկելի կիրառմանը, սակայն վերջին հետազոտությունը տրամադրել է դրանց կողմնակի ազդեցությունների՝ մինչ օրս ամենազանգվածային տեղեկությունը: