Ինտերակտիվ քարտեզը ցույց է տալիս Երկրի վրա կատարվողը. նա, կարծես, ամեն ինչ գիտի

Սիեթլից Քեմերոն Բեքարիոյի հեղինակած կայքը սկզբում մշակվել է նրա համար, որպեսզի ցուցադրվի Երկրի վրա քամիների տեղաշարժը: Տվյալները ստացվել են ԱՄՆ-ի Ազգային օդերևութաբանական ծառայության Կանխատեսման համաշխարհային համակարգից (GFS) և ներդրվել են մասշտաբացվող քարտեզի վրա: Քարտեզը թարմացվել է յուրաքանչյուր 3 ժամը մեկ, ինչը թույլ է տվել գրեթե իրական ժամանակում դիտարկել քամիները:

Այդ գործառույթը Earth կայքում մնացել է մինչ օրս, սակայն ներկայումս նախագիծը վերածվել է անհավատալի ծավալի տվյալների հավաքման հարթակի:

Ձախ կողմի ներքևում սեղմելով earth կոճակը՝ օգտատերը կարող է հետևել քամու ուժգնությանն աշխարհագրական տարբեր լայնություններում, ամպերում խոնավության պարունակությունը, դիսկոմֆորտի դասիչը (օդի զգայուն ջերմաստիճանը), օվկիանոսային հոսքի ուղղությունը, ալիքների բարձրությունը, ծովի մակերևույթի ջերմաստիճանը, գոլորշիացած գազերի մթնոլորտում ընթացիկ պարունակությունը, մթնոլորտի գոլորշային բաղադրությունը, ներառյալ տարբեր չափերի փոքր դիսպերային մասնիկների առկայությունը, ինչպես նաև տեղեկանալ, թե այդ պահին մոլորակի որ հատվածում կարելի է տեսնել հյուսիսափայլը:

Ծրագրում GFS-ից բացի ներգրավված են նաև Օվկիանոսային և մթնոլորտային հետազոտությունների ազգային վարչության (NOAA), NASA-յի՝ Երկրի դիտարկման համակարգերի (Գոդդարդի) 5 տարբերակների (GEOS-5), ինչպես նաև տարբեր գործակալությունների ու հետազոտական կենտրոնների տվյալները:

Երկիրը դիտարկել հնարավոր է 7 տարբեր դիտանկյուններից, կարելի է մոտեցնել քարտեզը՝ տեղափոխվելով և ծանոթանալով մոլորակի ցանկացածի կետի տվյալներին: