«Անհարմար զուգարանակոնքն» աշխատողներին կստիպի քիչ «ժամանակ ձգել» սանհանգույցում

Գրասենյակային աշխատողները կամ ինչպես Արևմուտքում են անվանում՝ «սպիտակ վերնաշապիկավորները» հաճախ սանհանգույց են գնում ոչ միայն ֆիզիոլոգիական գործառույթների համար, այլև՝ «ժամանակ ձգելու»: Զուգարանակոնքին նստած՝ նրանք մտածում են կյանքի մասին, քննարկումներ են անում սոցցանցերում կամ պարզապես հանգստանում են: Սակայն բրիտանացի Մահաբար Հիլլի ստեղծած միջոցը կարող է դրան վերջ դնել:

Հիլլի ղեկավարած StandartToilet ընկերությունը ներկայացրել է զուգարանակոնքի նախագիծ, որի նստատեղն ունի 13 աստիճան թեքվածություն: Նրա վրա նստելու դեպքում ծանրության ուժը կենտրոնանում է ոտքերի հատվածում, ինչը նստելուց րոպեներ անց ֆիզիկական անհարմարավետություն է ստեղծում: Հիլլի խոսքով՝ 13 աստիճանի դեպքում անհարմարությունն այդքան էլ մեծ չէ, սակայն վեր կենալու ցանկությունը շուտ է առաջանում:

Հեղինակը պնդում է, որ իր հնարքն օգնում է պահպանել մարմնի ուղղվածությունը և որովայնի մկանները պահել տոնուսի մեջ: Բայց հիմնական նպատակը գործատուներին օգտակար լինելն է: Աշխատակիցների ընդմիջումները միայն Մեծ Բրիտանիայում արդյունաբերության ոլորտում տարեկան արժենում են չորս մլրդ ֆունտ:

Ամռանը Protecting ՏՏ ընկերության կողմից իրականացված հարցումը ցույց է տվել, որ բրիտանական մի շարք քաղաքների բնակիչներ իսկապես աշխատաժամանակի մի մասն անցկացնում են սանհանգույցում: Օրինակ, լոնդոնցիները զուգարանում անցկացնում են օրական միջինում 28,5 րոպե: Սակայն ոչ բոլորն են այստեղ տեսնում լուծման ենթակա խնդիր: Մասնագետ Ջենիֆեր Քաուֆման-Բյուլերը գտնում է, որ զուգարանն աշխատակցի համար միակ վայրն է, որտեղ կարող են մեկուսանալ: Նրա համոզմամբ՝ կարիք չկա ստեղծել ևս մեկ վայր, որտեղ կհիշեցվի, որ մարդը պետք է մշտապես տանջվի:

Ոչ ավանդական զուգարանակոնքը համացանցում զարմանք է առաջացրել: Օգտատերերն այն անվանել են «կապիտալիզմի վերջին փուլ»: Նշվել է, որ այդ հնարքը կարող է խախտել հաշմանդամների և առողջական խնդիրներ ունեցողների իրավունքները: Ոմանք նույնիսկ կասկածել են, որ տեղեկությունը կարող է կեղծ լինել: Սակայն StandardToilet-ն իրական է և առկա է նաև պատվերի հնարավորություն: