Հայաստանում կորոնավիրուսով վարակվածության 47 նոր դեպք է հաստատվել (upd.)

Նոր տեսակի կորոնավիրուսով վարակվածների թիվը Հայաստանում հասել է 1248-ի՝ վերջին օրվա ընթացքում ավելանալով 47-ով:

Մահվան 1 նոր դեպք է գրանցվել. 75-ամյա պացիենտն ունեցել է կորոնավիրուսային հիվանդություն, հաստատված երկկողմանի ինֆիլտրատիվ թոքաբորբ։ Կինն ունեցել է նաև ուղեկցող խրոնիկ հիվանդություններ` զարկերակային գերճնշում III աստիճանի, ճարպակալում II-III աստիճանի: Բուժման ընթացքում զարգացել է սուր շնչական անբավարարություն III աստիճան, դիսթրես համախտանիշ, աթերոսկլերոզ գերազանցապես ուղեղի և կորոնար անոթների ախտահարումով: Թվով 20-րդն էր:

Մեկ օրում առողջացել է 121 մարդ՝ ամենամեծ թիվը մինչ օրս: Առողջացածների ընդհանուր թիվն ապրիլի 18-ի ժամը 11:00-ի դրությամբ դարձավ 523:

Հաղորդվում է, որ փաստացի բուժում է ստանում 705 պացիենտ: Նախորդ օրը նույնպես կատարվել է մեծ թվով թեստավորում: 47 դրականից բացի՝ ևս 956-ը բացասական են եղել:

UPD. Նախարար Արսեն Թորոսյանը հայտնել է, որ կորոնավիրուսային հիվանդության դեպքերի կրկնապատկման տեմպն այս պահին 17 օր է: Նրա խոսքով՝ եթե այս տեմպը պահպանվի, ապա մայիսի 4-ին մենք կունենանք 2500 դեպք, իսկ մայիսի 21-ին 5000 դեպք:

Թորոսյանը նշել է, որ անհրաժեշտ է բացառել հիվանդության մարդուց մարդ փոխանցումը` ամենուր սոցիալական հեռավորություն պահելով, միմյանց հետ սերտ շփման վարքագծերը փոխելով դեպի հեռավար շփումը, ինչպես նաև ձեռքերը հաճախակի լվանալով և ախտահանելով ու հնարավորինս դեմքին չդիպչելով: