Ավելի վաղ կորոնավիրուսային վարակի բուժման համար այդ մեթոդը կիրառած գիտնականն առողջացած մարդկանց քանակի վերաբերյալ ուշագրավ ցուցանիշներ է հրապարակել:
1004 բուժվողներից 1003-ն առողջացել են / © lavenirdelartois.fr
Մարսելի Ինֆեկցիոն հիվանդությունների միջերկրածովյան ինստիտուտի ղեկավար Դիդյե Ռաուլը հայտարարել է, որ կորոնավիրուսի բուժման իր նոր մեթոդաբանությունը, պարզվել է, բավականին արդյունավետ է:
Ինստիտուտում բուժում ստացող 1004 պացիենտներից 1003-ն առողջացել են: Մեկը մահացել է: Ռաուլի կողմից մշակված մեթոդաբանությունը հիմնված է հակամալարիական հիդրոքսիքլորոքին դեղամիջոցի վրա: Պացիենտներն այն ընդունում են ազիթրոմիցին հակաբիոտիկի հետ: Վերջինս կանխում է բակտերիալ սուպերվարակների առաջացումը:
Ավելի վաղ Դիդյե Ռաուլը և նրա գործընկերներն արդեն հաղորդել էին, որ հիդրոքսիքլորոքինն ու ազիթրոմիցինը մեկ շաբաթից քիչ ժամանակահատվածում ամբողջապես ձերբազատում են կորոնավիրուսային վարակից: Սակայն նախորդ երկու աշխատանքներն իրականացվել էին փոքրաթիվ պացիենտների մասնակցությամբ՝ համապատասխանաբար 24 և 80: Գիտնականի նոր հայտարարությունը կարող է էականորեն փոխել գիտական հանրության վերաբերմունքն առաջարկված բուժման տարբերակի նկատմամբ:
Սակայն բեկման մասին խոսելը դեռ վաղ է: Հիդրոքսիքլորոքինի արդյունավետության թեմայով հետազոտություններից ոչ մեկը դեռ չի հրապարակվել գրախոսական գիտական ամսագրում: Ռաուլի քննադատները նաև ուշադրություն են հրավիրում այն բանի վրա, որ խոսքը գնում է ոչ թե փորձարկումների, այլ դիտական հետազոտությունների մասին, որտեղ տվյալները հավաքվում են առանց իրադարձության մեջ ակտիվ միջամտությամբ: Այդ դեպքում մեծ է համակարգային սխալմունքի ի հայտ գալու հավանականությունը:
Լոնդոնի համալսարանական քոլեջի համակարգային կենսաբանության պրոֆեսոր Ֆրանսուա Բալլուի խոսքով՝ նոր մեթոդի մասին առաջին երկու աշխատանքների արդյունքները ոչնչի մասին չեն խոսում: Նա նշել է, որ Covid-19-ով վարակվածների մեծ մասը բուժվում է թե՛ Հիդրոքսիքլորոքինի օգնությամբ, թե՛ առանց դրա:
Դեղագործական քիմիայի ամերիկացի մասնակետ Դերեք Լոուն իր հերթին ցույց է տվել Ռաուլի հետազոտություններից մեկի անբավարարությունը: Նա ընդգծել է, որ առկա չեն պացիենտների դուրսգրման՝ հետազոտության ընթացքում փոփոխվող չափանիշները, բարդության տարբեր մակարդակներ ունեցող հիվանդների մասին տվյալները: Բացի այդ, թեև Լոուն կասկածի տակ չի դրել Դիդյե Ռաուլի հեղինակությունը, սակայն ֆրանսիացին եղել է մի քանի՝ գիտական տեսանկյունից կասկածելի հոդվածների համահեղինակ, որոնցում հայտնաբերվել են միկրոլուսանկարների կրկնօրինակումներ և նկարների խմբագրմամբ փոփոխված բլոտ հետազոտության արդյունքներ:
Ֆրանսիացի գիտնականների աշխատանքի նկատմամբ քննադատությունն այն էր, որ հետազոտությունն անցկացվել է միայն պացիենտների վրա, ովքեր ծանր հիվանդացության նշաններ չունեին: Դիդյե Ռաուլի հետ համահեղինակ Ֆիլիպ Գոտրեն այդ հանգամանքը բացատրել է նրանով, որ իրենց մարտավարությունը նպատակ է ունեցել բուժել այդ փուլում՝ հիվանդությունը դադարեցնելով մինչև լուրջ մակարդակի հասնելը:
Հրապարակման պահին, ըստ Ջոնս Հոփքինսի համալսարանի տվյալների, Covid-19-ով վարակվածների թիվն աշխարհում 741724 է: Կորոնավիրուսից մահացել է 35305 մարդ, առողջացել են 156841-ը: Հայաստանում վարակվածների թիվը 482 է: 3 մարդ մահացել է, 30-ն առողջացել են:
Իրանական աղբյուրը տեղեկացնում է, որ Թուրքիան ու Բաքուն մտադրություն են ունեցել հանկարծակի հարձակում ձեռնարկել Հայաստանի…
Քանի դեռ վերլուծական շրջանակներում փորձում են վեր հանել Իրանի և Ադրբեջանի միջև լարվածության իրական պատճառներն…
Ռուսական խաղաղապահ ստորաբաժանումն Արցախի «Հյուսիս» տեղանքում հրադադարի հնարավոր խախտումների կանխման և դիտակետերի անվտանգության ապահովման վարժանքներ…
Լճի ափամերձ եզրագիծը նահանջել է 1 կմ-ով, ջրի մակարդակն ընկել է 22-23 մ-ով: Ցամաքած հատվածներում…
Վարչապետ Փաշինյանի նախկին խորհրդական Լևոն Մազմանյանն ուշագրավ վերլուծություն է հրապարակել իր ֆեյսբուքյան էջում, որտեղ անդրադարձել…
Ի հեճուկս Ալիևի փորձերին՝ «Լեռնային Ղարաբաղ» անվանումը միջազգային փաստաթղթերից դուրս մղելու ուղղությամբ, Ստրասբուրգում ընդունվել է…