«Ալ-Մոդոնը» հայտնել է սիրիացի վարձկաններին Ադրբեջան ուղարկելու գործընթացի մասին

Մերձավոր Արևելքի փորձագետ Աբաս Ջուման իր տելեգրամյան էջում հաղորդել է, որ, ըստ լիբիական Ալ-Մոդոն պարբերականի, սիրիացի վարձկաններին Ադրբեջան են տեղափոխում՝ հատուկ ընթացակարգով նրանց հավաքագրելուց և ուսուցանելուց հետո:

Հաղորդվում է, որ Սիրիական ազգային բանակի ահաբեկիչներին Ադրբեջանի համար պատրաստելու գործընթացը մեկնարկել է օգոստոսի կեսերից: Հրամանատարներին հանձնարարվել է կամավորներին ընտրել մարտական գործողությունների նախկին մասնակիցներից. մարտական փորձառությունը գլխավոր պայմանն է:

Նշվում է, որ սիրիացիներն Ադրբեջանն ավելի են նախընտրում, քան՝ Լիբիան: Առաջին դեպքում նրանք սպանելու են հայերին, և ոչ՝ մուսուլմաններին: Բացի այդ, ինչպես հաղորդվում է, ադրբեջանական «արշավին» մասնակցելու համար թուրքերն ավելի շատ են վճարում, քան լիբիական մարտերին մասնակցելու համար:

Ադրբեջան մեկնելու պատրաստակամություն հայտնած ահաբեկիչները ոգևորված են նաև այն հանգամանքով, որ այնտեղ համեմատաբար հանդարտ իրավիճակ է, ինչը չի կարելի ասել Լիբիայի պարագայում:

Հաղորդվում է, որ ահաբեկիչների առաջին «խմբաքանակն» արդեն պատրաստ է: Շուրջ հազար մարդ ուսուցում է անցել Հալեպի մոտակայքում գտնվող Ալ-Բաբ քաղաքի ճամբարում: Փորձագետն ընդգծում է, որ եթե այդ ամենն իրականություն է, ապա զարմանալի չէ. Թուրքիան առաջին անգամը չէ, որ նման գործելաոճ է դրսևորում: