Ադրբեջանցի «բլոգերը» կարող է և հատուկ ջոկատային լինել

Միլանի Հայ Առաքելական Սուրբ Քառասուն Մանկունք եկեղեցում Միլանի հայ համայնքի ներկայացուցիչների հետ հանդիպման ժամանակ մասնակիցներից մեկը ներկայացել է որպես ադրբեջանցի բլոգեր և Նիկոլ Փաշինյանին հարց հղելու թույլտվություն է խնդրել: Վարչապետը թույլատրել է դիմել: Բլոգերը հարցրել է, թե ե՞րբ է Նիկոլ Փաշինյանը պատրաստվում դադարեցնել պատերազմը և վերադարձնել «ադրբեջանական հողերը»:

Փաշինյանն անակնկալի եկած ներկաներին հորդորել է հանգիստ վերաբերվել և պատասխանել է ադրբեջանցու հարցերին: Մինչ հարցուպատասխանի մանրամասները ներկայացնելը նշենք, որ բուռն քննարկման թեմա է դարձել բլոգերի ինքնությունը:

Պարզվում է՝ նա պատահական բլոգեր չէ, այլ Ադրբեջանի իրավապահ համակարգից է կամ հատուկ ծառայություններից: Սոցցանցերից հայտնի է դարձել, որ նա մերձ կապեր ունի ՌԴ նախագահի խոսնակ Դմիտրի Պեսկովի, արտգործնախարար Սերգեյ Լավրովի և այլ հայտնի գործիչների հետ:

Մեդիափորձագետ Սամվել Մարտիրոսյանը հայտնել է, որ Աբդուլաևը հայտնի է դեռևս 2011թ.: Նրա խոսքով՝ 2011թ. լրագրողները նկատել են, որ քաղաքացիական անձն օգնում է ոստիկաններին ցրել ցույցը՝ ուժ կիրառելով քաղաքացիների նկատմամբ:

Մարտիրոսյանը պատմել է, որ Աբդուլաևը ժամանակին կապ է ունեցել «Ղարաբաղ» ֆուտբոլային ակումբի հետ: Խարդախությունների մեջ է եղել, նրա դեմ քրգործ է հարուցվել՝ 100 հազար մանաթի վերաբերյալ, 7 տարի ազատազրկվել է: Մեդիափորձագետը ենթադրում է, որ դրա հիման վրա հետո իրեն հավաքագրում են արել (վերբովկա):

Անվտանգության մասին

Վարչապետի մամուլի խոսնակ Վլադիմիր Կարապետյանն այդ հարց ու պատասխանը միջադեպ չի համարել: Նրա խոսքով՝ քանի որ հայկական բոլոր եկեղեցիների մուտքն ազատ է, Միլանի եկեղեցին նույնպես բացառություն չի եղել: Փաշինյանի անվտանգության հետ կապված մտահոգությունների ի պատասխան՝ Կարապետյանը հայտնել է, որ իրականացվել են անվտանգության համապատասխան միջոցառումներ, սակայն փաստաթղթեր չեն ստուգվել:

Ադրբեջանցին հայտարարել է, որ Փաշինյանը ժողովրդավար է, խնդրել է դադարեցնել պատերազմը: ՀՀ վարչապետն ընդգծել է, որ անպատկերացնելի է, որ հայը մուտք գործի ադրբեջանական միջոցառում, որտեղ ելույթ է ունենում Իլհամ Ալիևը և հարց հղի: Հնչել են ծափահարություններ: Նիկոլ Փաշինյանը մանրակրկիտ պատասխանել է ադրբեջանցու հարցերին: Խոսել է Խոջալուի դեպքերի, Արցախի հարցի լուծման գործընթացի մասին:

Բլոգեր ներկայացածն անհանգստացել է իր անվտանգության համար, բայց Նիկոլ Փաշինյանը երաշխավորել է նրա անվտանգությունը՝ աշխատակիցներին կարգադրելով ուղեկցել ադրբեջանցուն: