Ալեքսան Ալեքսանյանն ազատվել է ՀՀ ԶՈւ բարոյահոգեբանական ապահովման վարչության պետի պաշտոնից

Ո՞վ է գեներալ-մայոր Ալեքսանյանը, ով Զինված ուժերում է 1992թ.-ից, վերջին պաշտոնին նշանակվել էր 2019թ. նոյեմբերի 28-ին և ուներ մեկ տասնյակից ավելի պարգևներ:

ՀՀ նախագահ Արմեն Սարգսյանը վարչապետ Նիկոլ Փաշինյանի առաջարկությամբ 2020թ. փետրվարի 19-ին հրամանագիր է ստորագրել, որով գեներալ-մայոր Ալեքսան Ալեքսանյանն ազատվել է ՀՀ Զինված ուժերի բարոյահոգեբանական ապահովման վարչության պետի պաշտոնից:

Մինչ Ա.Ալեքսանյանի կենսագրությունը ներկայացնելը՝ հիշեցնենք, որ Վարչապետի մեկ այլ առաջարկությամբ նույն օրը պաշտոնից ազատվել է նաև ՀՀ Պաշտպանության նախարարության ռազմական ոստիկանության պետի պաշտոնից: Նույն օրերին Արցախի նախագահ Բակո Սահակյանի հրամանագրով Կարեն Աբրահամյանն է ազատվել Արցախի ՊՆ-ՊԲ հրամանատարի պաշտոնից:

Ալեքսան Ալեքսանյանի մասին. Կրթություն

— 1979թ. ավարտել է Արմավիրի N9 միջնակարգ դպրոցը:

— 1980-1985թթ. սովորել և ավարտել է Երևանի պոլիտեխնիկական ինստիտուտը:

— 2002թ. ավարտել է ՌԴ ՊՆ համազորային ակադեմիայի դասընթացները:

Գործունեություն

— 1985-1992թթ. աշխատել է «Հայսանտեխմոնտաժ» միավորումում:

— 1992 – 2003թթ. ՀՀ Զինված ուժերում զբաղեցրել է ղեկավար պաշտոններ:

— 2009թ. փետրվարի 27-ին նշանակվել է ՀՀ ԶՈՒ անձնակազմի հետ տարվող աշխատանքների վարչության պետ:

— 2012թ սեպտեմբերին ստացել է գեներալ-մայորի զինվորական կոչում:

— 2019թ. նոյեմբերի 28-ից մինչև 2020թ. փետրվարի 19-ը զբաղեցրել է ՀՀ ԶՈՒ բարոյահոգեբանական ապահովման վարչության պետի պաշտոնը:

Պարգևներ

Պարգևատրվել է՝

— «Սուրբ Վարդան Մամիկոնյան» շքանշանով,

— «Հայրենիքի մատուցած ծառայությունների համար»1-ին աստիճանի,

— ՀՀ և ԼՂՀ Մարտական ծառայության պետական,

— «Մարշալ Բաղրամյան»,

— «Անդրանիկ Օզանյան»,

— «Դրաստամատ Կանայան»,

— «Գարեգին Նժդեհ»,

— «Անբասիր ծառայության համար» 1-ին, 2-րդ, 3-րդ, 4-րդ աստիճանների և այլ գերատեսչական մեդալներով,

— անվանական զենքով:

Հավելենք, որ նշված բարձրաստիճան զինվորականների ազատմանը նախորդել էին բանակում մեկ տասնյակից ավելի դժբախտ պատահարների և ինքնասպանության կամ ինքնասպանության հասցնելու հետևանքով մահվան ելքով դեպքերը: Այդ կապակցությամբ Վարչապետի մոտ կայացել էր խորհրդակցություն, որտեղ, ըստ Նիկոլ Փաշինյանի, կայացվել են կարևոր, այդ թվում՝ կադրային որոշումներ: