Առողջապահությո՞ւն, թե՞ անձնական շահ. նախարարի ու խորհրդականի պայքարին ԵՊԲՀ ռեկտորն ու այլ անձինք են միանում

Սեպտեմբերի 3-ին միջադեպ տեղի ունեցավ Առողջապահության նախարարի մամուլի ասուլիսի ժամանակ: Նախարարի նախկին խորհրդատու Գևորգ Թամամյանի միջամտությամբ ասուլիսը տապալվեց: Արսեն Թորոսյանը և իր նախկին խորհրդականը բանավեճը շարունակեցին անջատ՝ ֆեյսբուքյան ուղիղ եթերով և ասուլիսներով:

Ինչի՞ց է սկսվել կոնֆլիկտը

Օգոստոսի 20-ին Առողջապահության նախարարի ուռուցքաբանության գծով խորհրդատու Գևորգ Թամամյանն իր ֆեյսբուքյան էջում հայտարարություն էր տարածել՝ հաղորդելով իր հրաժարականի մասին: Թամամյանը գերատեսչության ղեկավարությանը մեղադրել էր սին մեկնաբանություններ և պոպուլիստական հայտարարություններ կատարելու մեջ:

Նախարարը ֆեյսբուքյան ուղիղ եթերում, անդրադառնալով իր դեմ սկսված արշավին, նշեց, որ այն կազմակերպած է ԵՊԲՀ-ի ռեկտոր Արմեն Մուրադյանի կողմից: Նրա խոսքով՝ Արմեն Մուրադյանն իր պաշտոնը ժառանգություն է ստացել, կարծում է, որ նոր իշխանությունները մեծ վտանգ են ներկայացնում Մուրադյանի պաշտոնավարման համար: Արսեն Թորոսյանի համոզմաբ՝ իր դեմ արշավն սկսվել է ԵՊԲՀ խորհրդի կազմը փոխելու մտադրությունից հետո:

Ինչո՞ւմ են մեղադրում իրար

Նախարարի նախկին խորհրդական Գևորգ Թամամյանը, Արսեն Թորոսյանի մամուլի ասուլիսը տապալելուց հետո, զբաղեցնելով նրա տեղը, մի շարք մեղադրանքներ ներկայացրեց Առողջապահության նախարարի հասցեին:

Դրանցից մեկը Թորոսյանի զինվորական ծառայությանն էր վերաբերում: Թամամյանի խոսքով՝ Թորոսյանը բանակում ծառայել է որպես գրագիր, ինչն ինչքը ավելի քիչ պատվաբեր ծառայություն է համարում:

Ի պատասխան մեղադրանքին՝ Արսեն Թորոսյանը նշեց, որ դա անձնական հարց է և ընդհանրապես կապ չունի իր պաշտոնավարման և կոնֆլիկտի իրական խնդրի հետ:

Նախկին խորհրդական, արյունաբան Թամամյանը, խոսելով պետպատվերի շրջանակներում կատարվող վերաբաշխումների մասին, նախարարին մեղադրեց անհիմն վերաբաշխումների մեջ: Մասնավորապես նշեց նախարարի կնոջ հիվանդանոցին մեծ քանակով պետպատվեր հատկացնելու մասին:

Արսեն Թորոսյանը պատախանեց, որ իր կինը հիվանդանոց չունի, պարզապես աշխատում է որպես տնօրեն, իսկ Թամամյանի նշած 2,7 մլրդ դրամ հատկացումը չի համապատասխանում իրականությանը, թիվը չափազանցված է, բաշխման գործընթացում ներգրավված են նաև այլ հաստատություններ:

Ի՞նչ կապ ունի իրանական ընկերությունը

Թամամյանի հաջորդ մեղադրանքը Ուռուցքաբանության ազգային կենտրոնում իրականացված ստուգումներին էր վերաբերում: Նրա համոզմամբ՝ Կենտրոնի տնօրենի նկատմամբ անհիմն կերպով է ճնշում գործադրվում, քանի որ ԱԱԾ-ն ստուգումներով թերացումներ, յուրացումներ չի արձանագրել:

Մինչդեռ նախարարը փաստաթղթերով ներկայացրեց եղելությունը: Իրանական Վարան Փարթո Դարման ընկերությունը ցանկացել է Հայաստանում ներդրում կատարել ուռուցքաբանության ոլորտում: Այդ նպատակով հիմնվել է ընկերություն: Ֆանարջյանի անվան ուռուցքաբանության ազգային կենտրոնի տնօրեն Արմեն Տանանյանը պահանջել է այդ ընկերության բաժնետոմսերի 50%-ը: Հետագայում պահանջել է կատարվելիք ներդրումների 50%-ը նույնպես փոխանցել իրեն:

Արդյունքում՝ Կենտրոնը մինչ օրս չի կատարել գործունեություն, ինչի համար դիմել է Նախարարին՝ խնդիրը կարգավորելու և Տանանյանին այս գործից հեռացնելու խնդրանքով: Ուռուցքաբանության կենտրոնի տնօրենը հեռացվել է աշխատանքից:

Իրանական ընկերության նամակի հրապարակումից հետո Թորոսյանի դեմ արշավը նոր թափ ստացավ:

Ի՞նչ կապ ունի Արմեն Մուրադյանը

Առողջապահության նախարար Արսեն Թորոսյանն իր ֆեյսբուքյան ուղիղ եթերի ժամանակ հայտարարեց, որ Թամամյանն ինքնուրույն չի գործում, նրան ուղղորդում է ԵՊԲՀ ռեկտոր Արմեն Մուրադյանը:

Նախարարի խոսքով՝ խնդիրը ծագել է նախորդ տարվանից, երբ առաջացել է Երևանի պետական բժշկական համալսարանի խորհրդի կազմը փոխելու հարց, իսկ Մուրադյանն անհանգստացած իր պաշտոնով, ուստի դիմում է նախարարի վարնակիշը գցելու քայլերին:

Ի պատասխան Թորոսյանի հայտարարությանը՝ Արմեն Մուրադյանը բարձր գնահատեց Գևորգ Թամամյանի մարդկային հատկանիշները և մասնագիտական հմտությունները: Նրա խոսքով՝ նախարարը ցուցաբերել է ցինիզմ՝ նշելով, թե Վերականգնողական կենտրոնում պահվում է 50 հաշմանդամ, 50-ն էլ հաշմանդամ են մեռնելու, ինչո՞ւ են նրանց վրա գումար ծախսում:

Արսեն Թորոսյանն իր հերթին հերքել է 50 հոգու վերաբերյալ Արմեն Մուրադյանի և Գևորգ Թամամյանի հայտարարությունները:

Նախարարն իսկապե՞ս թերացել է

Բազմաթիվ քաղաքացիներ, ովքեր ինչ-ինչ խնդիրներով առընչվել են քաղցկեղի բուժման պրոցեսին, փաստում են, որ ոլորտ կարգավորվում է, էականորեն փոխվել է թե բժշկական անձնակազմի սպասարկման որակը, թե բուժման արդյունավետությունն է բարձրացել:

Menu.am-ի հիմնադիր Վահան Քերոբյանի, Միջազգային և անվտանգության հարցերի հայկական ինստիտուտի հիմնադիր Ստյոպա Սաֆարյանի կարծիքներին հետևել է նաև բժկական կենտրոններից մեկի հայտարարությունը, որն արձանագրել է ոլորտում կատարվող լրջագույն փոփոխությունները:

Ի՞նչ է սպասվում

Մուրադյանի և Թամամյանի աջակիցները պահանջում են Արսեն Թորոսյանի հրաժարականը: Հաղորդվում է, որ ԵՊԲՀ ռեկտորը պատրաստվում է դիմել դատարան՝ Արսեն Թորոսյանի դեմ հայցադիմումով:

Առողջապահության նախարարն իր հերթին նշել է, որ այսպիսի մի արշավ էլ նախորդ տարի էր սկսվել իր դեմ: Խոսքը Արա Մինասյանի մասին է՝ Սերժ Սարգսյանի խնամին, ում ուղղված մեղադրանքներից հետո նույնպես Արսեն Թորոսյանին բազմաթիվ մութ ծրագրերի մեջ մեղադրեցին: Արդյունքում Արա Մինասյանի մեղադրանքը հաստատվեց: Նա այժմ հետախուզման մեջ է:

Նախարար Թորոսյանի խոսքով՝ այս միջադեպը շատ նման է Մինասյանի գործին, ուստի հույս ունի, որ կարճ ժամանակում ամեն ինչ իր տեղը կընկնի, և իր դեմ արշավը հաջողություն չի ունենալու:

Նախարարի նախկին խորհրդական Գևորգ Թամամյանն էլ այս ընթացքում հայտարարարում է, որ նախարարի կողմից ճշմարտությունը թաքցվում է, իրականությունը շուտով ջրի երես է դուրս գալու: