Եկեղեցին անտեսեց կոչերն ու բազմամարդ պատարագ մատուցեց

Կորոնավիրուսի կանխարգելման հանձնաժողովը քննարկում է պետական մարմինների աշխատանքը հեռահար եղանակով կազմակերպելու հարցը, նախարար Արսեն Թորոսյանն ու մյուս ղեկավարները կոչ են անում չմասնակցել բազմամարդ միջոցառումներին, հետաձգել հանդիսություններն ու այլ արարողություններ:

Այդ ընթացքում, սակայն, տարբեր եկեղեցիներում պատարագ է մատուցվում, որին մասնակցում են հարյուրավոր մարդիկ:

Հաղորդվում է, որ Երևանի Սբ. Գրիգոր Լուսավորիչ եկեղեցում այսօր պատարագ է մատուցվել: Լուսանկարներից ու տեսանյութից երևում է, որ շատ քչերն են պատարագին դիմակով մասնակցել:

Պատարագ է մատուցվել նաև այլ եկեղեցիներում: Որոշներում սահմանափակումը վերաբերել է միայն խաչը համբուրելուն, սակայն մյուս արարողակարգը բնականոն կերպով է ընթացել: Այս հանգամանքն արժանացել է օգտատերերի բուռն քննադատությանը:

Օգտատերերից մի քանիսն այսօրվա պատարագը բազմամարդ կազմակերպելը որակում են միտումնավոր քայլ՝ ընդդեմ աշխարհիկ իշխանությունների: Լրագրող, վերլուծաբան Թաթուլ Հակոբյանն, օրինակ, համոզված է, որ սա անձամբ Նիկոլ Փաշինյանի դեմ է ուղղված:

Ավելի վաղ անկախ պատգամավոր Արման Բաբաջանյանը կոչով դիմել էր հոգևոր հայրերին՝ ուղիղ հեռարձակմամբ պատարագը մատուցելու խնդրանքով:

Պատգամավորի խնդրանքը, փաստացի, չի կատարվել, սակայն ուշացումով հայտնի դարձավ, որ երկուշաբթի օրը քննարկում է տեղի ունենալու:

Ժողովը գումարվելու է Վեհափառի նախագահությամբ: