Մոսկվա-Երևան չվերթի օդանավի ուղևորներին տարհանել են. կան տուժածներ

Մոսկվայի «Շերեմետևո» օդանավակայանում Nordwind Airlines  ավիաընկերության Մոսկվա-Երևան չվերթի օդանավը ծխի հոտի պատճառով ընդհատել էթռիչքը:

Հաղորդվում է, որ ողևորներին տարհանել են փչվող սանդուղքի միջոցով: Տուժել է 8 մարդ, երկուսին տեղափոխել են հիվանդանոց: Օդանավում հրդեհ չի բռնկվել:

Ավիաընկերության հաղորդմամբ, Մոսկվայի ժամանակով 01։00-ին N4-477 SVO-EVN B738 (VPBSZ) չվերթ-ը մեկնարկած ինքնաթիռում կողմնակի հոտ է զգացվել։ 01։03-ին օդաչուների խցիկում ծխի ազդանշանը միանալուց հետո դեռևս թռիչքուղու վրա գտնվող օդանավի հրամանատարը ցամաքային ծառայությանը զեկուցել է արտակարգ իրավիճակի մասին և որոշում կայացրել կասեցնել թռիչքը։

Թռիչքը պետք է իրականացներ Boeing 737 օդանավը: Սակայն պատահարի պատճառով Մոսկվա-Երեւան չվերթը կայացել է Մոսկվայի ժամանակով 05.19-ին, այլ օդանավով:

Օդանավակայանի տվյալներով՝ օդանավում եղել է 179 մարդ (162 մեծահասակ, 11 երեխա եւ 6 անձնակազմ): Մինչդեռ ՌԴ ԱԻՆ-ը հաղորդել է, որ օդանավում եղել է 187 մարդ։

UPD. ՌԴ Քննչական կոմիտեն ուսումնասիրում է օդանավում առաջացած ծխի պատճառները։ Միաժամանակ հետաքննություն է իրականացնում նաև Մոսկվայի միջտարածաշրջանային տրանսպորտային դատախազությունը, որը պլանային ստուգումներ է իրականացնում Շերեմետևոյի ամբողջ ցամաքային ծառայությունում։ Հետազոտություններ է անցկացնում նաև Ռոսավիացիայի հատուկ հանձնաժողովը։ Ռուսական տրանսպորտային վերահսկողության ծառայությունը նույնպես ստուգումներ է սկսել։

Հաղորդվել է, որ ինքնաթիռն անցել է մինչթռիչքային բոլոր ստուգումները, թերություններն չեն հայտնաբերվել։

UPD 2. Օդանավից տարհանված ուղևորներից երկուսը (ծնված՝ 1965թ․-ին և 1974թ․-ին) գտնվում են մերձմոսկովյան Խիմկի քաղաքի հիվանդանոցում։ Քաղաքացիներից մեկի մոտ ախտորոշվել է շաքարային դիաբետի սրացում, մյուս քաղաքացին ստացել է մարմնական վնասվածքներ։ Չվերթի ուղևորներից ևս 19-ը հրաժարվել են այլընտրանքային թռիչքից։