Մարզերի ու Երևանի վարչական շրջանների միջև տեղաշարժը սահմանափակվում է

Պարետի որոշմամբ ապրիլի 1-ից մինչև ապրիլի 12-ը ներառյալ Հայաստանում Արտակարգ դրության իրավական ռեժիմով պայմանավորված սահմանափակումներ են գործելու, որոնք ներկայացնում ենք ստորև.

Ազատ տեղաշարժի սահմանափակում

— Սահմանափակվում է մարդկանց ազատ տեղաշարժման իրավունքը և սահմանվում է անձանց պարտադիր ինքնամեկուսացում: Ինքնամեկուսացման վայրը չի կարող փոխվել մինչև Որոշմամբ սահմանված ժամկետի ավարտը:

— ՀՀ մարզերի և մարզերի ու Երևանի վարչական շրջանների միջև բնակչության ազատ տեղաշարժը սահմանափակվում է: Հանրային տրանսպորտի՝ այդ թվում մետրոպոլիտենի աշխատանքը դադարեցվում է:

— ԱԱԾ-ի և Ոստիկանության կողմից սահմանված վայրերում ապրիլի 1-ի ժամը 14:00-ից հատուկ անցակետեր են տեղադրվում:

— Թեթև մարդատար մեքենայով թույլատրվում է միայն 1 ուղևորի տեղափոխումը: Ինքնուրույն տեղաշարժման խնդիր ունեցողների հետ կարող է ուղեկցող լինել:

Բացառություններ

— Բացառություն են արված չարգելված տնտեսական գործունեության գործատուների մոտ աշխատողները՝ սահմանված կարգով՝ թղթային տարբերակով կամ հավելվածով լրացված ձևի և անձնագրի հիման վրա (ուժի մեջ է մտնում ապրիլի 1-ի ժամը 23:59-ից): Իրավապահ մարմինների և որոշ այլ կառույցների աշխատակիցներ կարող են ներկայացնել ծառայողական վկայաններ:

— Բացառություն են նաև մինչև ապրիլի 2-ը ժամը 23:59-ն ինքնամեկուսացման վայր մեկնումը կամ վերադարձը, այգեգործական կամ գյուղատնտեսական աշխատանքներ իրականացնելու համար տեղաշարժվելը, հիվանդանոց, հոգեհանգստի մեկնելը՝ լրացված ձևաթղթով:

— Բնակության վայրից մինչև 500մ հեռավորությամբ օրվա ընթացքում 1 անգամ ֆիզիկական վարժություններ կատարելու կամ հեծանվավարության նպատակով՝ կրկին լրացված ձևաթղթով:

— Մեքենայով տեղաշարժման արգելքը չի վերաբերում երեխաներին, նույն ընտանիքի անդամներին, նույն ընկերությունում աշխատողներին:

— Հանրային տրանսպորտից թույլատրվում է միայն տաքսիների և երկաթուղու աշխատանքը: