Հայտնի բլոգեր Ալեքսանդր Լապշինն անդրադարձել է նախօրեին Ադրբեջանի հնչեցրած պաշտոնական հայտարարությանը՝ Մեծամորի ատոմակայանին հարվածելու հնարավորության վերաբերյալ: Նրա խոսքով Ադրբեջանի սպառնալիքները դատարկություն են՝ ուղղված բացառապես ներքին լսարանին:
Բլոգերը՝ Տավուշում, 2019թ. փետրվար / © Ալեքսանդր Լապշին
Բլոգերի խոսքով՝ ադրբեջանական հայտարարությունները «դատարկ խոսքեր են և Ադրբեջանը երբեք չի գնա այդ քայլին»: Ոչ՝ նրա համար, որ չի կարող: Հարվածելու լիովին ունակ են, քանի որ հրթիռները դա թույլ են տալիս: Լապշինն ընդգծել է, որ տեխնիկապես դա կարող է իրականացվել ոչ միայն բուն Ադրբեջանի տարածքից, այլև՝ Նախիջևանից, որտեղից մինչև Երևան հեռավորությունը մոտ 70 կմ է: Սակայն, ըստ Լապշինի, Իլհամ Ալիևն այդպիսի հրաման չի արձակի երեք պատճառով:
Առաջին պատճառը բերելիս հրեա բլոգերը նշել է, որ բռնապետ Ալիևին Հայաստանի հետ լայնածավալ պատերազմ հարկավոր չէ, այլ՝ սահմանային պրովոկացիաներ՝ ադրբեջանցիներին իրական խնդիրներից շեղելու նպատակով: Երկիրը, որի եկամուտների 80%-ը նավթից են ստացվում, ներկայումս գնանկման պատճառով վատ վիճակում է հայտնվել: Լապշինը նշել է, որ չնայած նավթային խնդիրներին՝ իշխող վերնախավն ու տարբեր կլաններ շարունակում են պայքարել նավթային մասնաբաժինը մեծացնելու համար:
Բլոգերը դրան ավելացնում է նաև երկրում կորոնավիրուսի պատճառով ստեղծված իրավիճակը, շարունակվող կարանտինը և հասարակ քաղաքացիների դժգոհությունը: Լապշինը հիշեցնում է, որ Բաքվում «հայերի դեմ» ցույց անողների նկատմամբ վերահսկողություն Ալիևը չկարողացավ պահել: Կիրառվեցին բիրտ միջոցներ՝ «հայերին պատժելու նպատակով» սեփական երկրի խորհրդարանի շենքի վրա հարձակվողների նկատմամբ:
Նրա խոսքով՝ եթե Ալիևը երկիրը ներքաշի լայնածավալ պատերազմի մեջ ու պարտվի, ստիպված կլինի փախուստի դիմել: Լապշինն այստեղ կատակել է՝ նշելով, որ Ալիևը կփախչի այն նույն ինքնաթիռով, որով իրեն 2017թ. փետրվարին տեղափոխել է Բաքու՝ իր ժողովրդին ցույց տալով, թե ինչ հզոր ղեկավար է. բլոգեր է ձերբակալել: «ԶԼՄ-ների հաղորդմամբ,- նշում է Լապշինը,- նրա ընտանիքն առանձնատուն է գնել Մերձմոսկվայում, Ղրղզստանի իշխանազուրկ նախագահ Ակաևի և Ուկրաինայի նախկին ղեկավար, փախստական Յանուկովիչի տների հարևանությամբ: Լապշինը ենթադրել է, որ Ալիևն, ամեն դեպքում, փախուստի վայրը նախապատրաստում է միջնաժամկետ հեռանկարի համար, ոչ՝ մոտակա:
Մեծամորի ԱԷԿ-ը թեև հայկական է, սակայն ղեկավարվում է ռուսական Ռոսատոմի կողմից: Կայանում մեծ թվով ռուսաստանցի ինժեներներ ու մեխանիկներ են աշխատում: Ատոմակայանին ուղղված ցանկացած հարված կհանգեցի Ռուսաստանի հարյուրավոր քաղաքացիների մահվան: Լապշինը հիշեցնում է նաև, որ ռուսական 102-րդ ռազմաբազան, որ տեղակայված է Գյումրիում, Երևանում և Մեղրիում, պատասխանատու է նաև Մեծամորի ԱԷԿ-ի անվտանգության ապահովման համար:
Նրա խոսքով՝ ռուս զինվորականներն ունեն անհրաժեշտ բոլոր միջոցները՝ թույլ չտալու ադրբեջանական հարվածը՝ C-300B զենիթահրթիռային համալիրներ (988-րդ ԶՀ գունդ), МиГ-29 կործանիչներ, Ми-24П, Ми-8МТ ուղղաթիռներ (3624-րդ ավիացիոն բազա, Երևան, Էրեբունի): Լապշինը նշել է, որ այս ամենը հասկանում են նաև Ադրբեջանում, իսկ Ռուսաստանի ներկայիս վիճակը բնավ չի նշանակում, թե «ռուսական արջը չի կարող կծել»:
Բլոգերն ընդգծել է, որ Ալիևը ցանկացել է Ռուսաստանին ներքաշել Արցախյան հակամարտությունում՝ Էրդողանի հետ միասին, Պուտինին մեղադրել ագրեսիայի մեջ՝ Հայաստանի հետ, ընդդեմ Բաքվի: Սակայն այս դեպքում Ադրբեջանն է դառնում ագրեսոր, իսկ Ռուսաստանը միայն պաշտպանում է սեփական օբյեկտները:
Ալեքսանդր Լապշինը հիշեցրել է, որ Մեծամորի ԱԷԿ-ը Թուրքիայի սահմանից հեռու է ընդամենը 20 կմ: Թուրքական խոշոր Իգդիր քաղաքից՝ 40 կմ: Հարվածելու հնարավորությունն ունենալու և դա իրականացնելու դեպքում հարվածի տակ կհայտնվի Թուրքիայի ամբողջ հյուսիս-արևելքը: Էրդողանը, Լապշինի խոսքով, Ալիևին այդ դեպքում «շնորհակալություն հաստատ չի հայտնի»:
Ալեքսանդր Լապշինը վերջում շեշտել է, որ Ադրբեջանի բոլոր սպառնալիքները «դատարկություն են՝ ուղղված բացառապես ներքին լսարանին»:
Իրանական աղբյուրը տեղեկացնում է, որ Թուրքիան ու Բաքուն մտադրություն են ունեցել հանկարծակի հարձակում ձեռնարկել Հայաստանի…
Քանի դեռ վերլուծական շրջանակներում փորձում են վեր հանել Իրանի և Ադրբեջանի միջև լարվածության իրական պատճառներն…
Ռուսական խաղաղապահ ստորաբաժանումն Արցախի «Հյուսիս» տեղանքում հրադադարի հնարավոր խախտումների կանխման և դիտակետերի անվտանգության ապահովման վարժանքներ…
Լճի ափամերձ եզրագիծը նահանջել է 1 կմ-ով, ջրի մակարդակն ընկել է 22-23 մ-ով: Ցամաքած հատվածներում…
Վարչապետ Փաշինյանի նախկին խորհրդական Լևոն Մազմանյանն ուշագրավ վերլուծություն է հրապարակել իր ֆեյսբուքյան էջում, որտեղ անդրադարձել…
Ի հեճուկս Ալիևի փորձերին՝ «Լեռնային Ղարաբաղ» անվանումը միջազգային փաստաթղթերից դուրս մղելու ուղղությամբ, Ստրասբուրգում ընդունվել է…