Իժերի նոր տեսակն անվանել են «Հարի Փոթերից» հայտնի մութ մոգի պատվին

2019թ. հունիս-օգոստոս ամիսներին հնդկացի սողունաբանների խումբը, Հարավային Գուջարաթի համալսարանից Հարշիլ Պատելի գլխավորությամբ, Հնդկաստանի հյուսիս-արևելքում գտնվող Արունաչալ-Պրադեշ նահանգում գիտարշավ է իրականացրել և իժերի նոր տեսակ է հայտնաբերել:

Գիտնականներն օձին դասակարգել են շառաչող (փոսիկագլխավոր) օձերի (Crotalinae) ենթաընտանիքին և նիզակագլխավորների ցեղին (Trimeresurus), իսկ տեսակային անվանումը դրանք ստացել են Հարի Փոթերի մասին գրքի նշանավոր բացասական հերոսներից մեկի պատվին՝ Trimeresurus salazar՝ ի պատիվ Սալազար Սլիզերինի, ում անունով էլ կոչվել է Հոգվարդսի կախարդական դպրոցի ֆակուլտետը: Գտածոյի հեղինակներից Զեշան Միրզան նշել է, որ նա կարողանում էր խոսել օձերի լեզվով, և իրենք նրա երկրպագուներն են:

«Սալազարի շառաչող օձը» թունավոր է: Այն պատված է վառ կանաչավուն թեփուկներով՝ տեղի թավ խոտի պայմաններում ապրելուն հարմար, իսկ արուների մոտ հորիզոնական նարնջակարմիր գծեր են՝ քթից մինչև ծոծրակը՝ աչքի ստորին մակարդակին: Մոտ հարազատներից տարբերվում է ատամների մեծ քանակով ու կոպուլյատիվ օրգանների կառուցվածքով: Տեսակի առանձնացումը հաստատել է նաև այդ օձի միտոքոնդրային ԴՆԹ-ի հետազոտությունը:

Գիտնականներն ընդգծում են, որ Հնդկաստանի օձերի աշխարհը յուրահատուկ բազմազան է և մինչ օրս քիչ ուսումնասիրված: Այսպես, երկրի տարածքում բնակվում են շուրջ 50 տեսակի շառաչող օձերից 15-ը, 7-ը՝ Արունաչալ-Պրադեշ նահանգում: Սակայն այդ գնահատականը կարող է ցածր լինել. բազմաթիվ հետազոտություններ վերաբերում են դեռևս բրիտանական գաղութային տիրապետության շրջանին: Բացի այդ՝ այս խմբի կենդանիներն ավելի քիչ արտաքին տարբերություններ ունեն, թաքնվող են, ինչը դժվարացնում է նրանց որոնումները, հետազոտությունն ու նույնականացումը: