Հարցում. Հայաստանում ավելի շատ վստահում են Եվրամիությանը, քան ԵԱՏՄ-ին

Եվրոպական միությունը հարցումների միջոցով փորձել է պարզել, թե ինչպես են գնահատում Արևելյան գործընկերության երկրների քաղաքացիներն իրենց երկրների և ԵՄ միջև հարաբերությունները:

EU NEIGHBOURS east նախագծի շրջանակներում իրականացված հարցումների համաձայն, Հայաստանի բնակչության 62%-ը դրական վերաբերմունք ունի Եվրոպական միության նկատմամբ: Բացասական է արտահայտվել միայն հարցվածների 6%-ը:

Հատկանշական է, որ նախորդ տարվա ցուցանիշն, ըստ աղբյուրի, ավելի քիչ է եղել. 2018թ. 48%-ն էր դրական կարծիք հայտնել ԵՄ մասին:

Մեծ է նաև Եվրամիության նկատմամբ Հայաստանի ազգաբնակչության վստահությունը` 61%, մինչդեռ Եվրասիական տնտեսական միությանը վստահում է հարցվածների 48%-ը:

ԵՄ Արևելյան գործընկերության 6 երկրներում՝ Հայաստան, Ադրբեջան, Բելառուս, Վրաստան, Մոլդովա, Ուկրաինա, անցկացված հարցումների տվյալներն ուսումնասիրելիս տեսնում ենք, որ հայերն ամենաբարձրն են գնահատում ԵՄ հետ հարաբերությունները. ԱլԳ տարածաշրջանային միջին ցուցանիշը 67%-ն է, իսկ մեզանում այն կազմել է 92%:

Զեկույցի համաձայն, հայաստանցիների 71%-ն իրազեկված է ԵՄ կողմից երկրին տրամադրված ֆինանսական աջակցության մասին:

Մեթոդաբանություն

Ամենամյա հարցումն իրականացվել է Հայաստանում, Ադրբեջանում, Բելառուսում, Վրաստանում, Մոլդովայում և Ուկրաինայում՝ 2019թ.-ի փետրվար – մարտ ամիսներին՝ 6000 դեմ առ դեմ հարցազրույցների միջոցով (յուրաքանչյուր երկրում՝ 1000 հարցազրույց):

Հարցումն իրականացվել է ACT ընկերության և նրա ցանցային գործընկերների կողմից: Ծրագիրն իրականացվում է Ecorys-ի գլխավորած կոնսորցիումի կողմից: Ծրագիրը ֆինանսավորվում է Եվրոպական միության կողմից: