Միջանցքների խնդիրը. ո՞ւմ ձեռնտու չէ «Հյուսիս-հարավ»-ը

Կան կարծիքներ, թե Հայաստանի տարածքով Հյուսիս-հարավ միջանցքի անցկացումը ձեռնտու է Եվրոպային, Իրանին և Չինաստանին, սակայն ձեռնտու չէ Ռուսաստանին ու Ադրբեջանին:

Համարվում է, որ հենց այդ պատճառով Հայաստանի տարածքի նկատմամբ ադրբեջանական ոտնձգությանն առաջինն արձագանքեցին եվրոպական երկրները, որոնց դեսպաններն այցելեցին Սյունիք: Եվրոպական երկրների մեծ մասը հստակ պահանջել է ադրբեջանական զորքերի դուրսբերում Հայաստանի տարածքից:

Հյուսիս-հարավ միջանցքի հիմնական առանձնահատկություն է համարվում այն, որ այդ երթուղով անցնելու են նաև գազի և նավթի խողովակներ: Ռուսաստանին, ինչպես նշվում է, նոր մրցակիցներ պետք չեն` ի դեմս իրանական էներգառեսուրսների, որոնք Հայաստանի տարածքով կարող են հասնել Ուկրաինա և Եվրոպայի այլ երկրներ: Ադրբեջանին դա նույնպես ձեռնտու չէ. արդեն կառուցված խողովակներ կան, և մտադիր են ամբողջ հզորությամբ օգտագործել ու կառավարել դրանք:

Թուրքիան ցանկություն ունի դառնալու հաղորդակցային հանգույց` կարևոր ուղիներն իր տարածքով անցկացնելով: Հենց այդ պատճառով այդ երկրներին անհանգստացնում է ԱՄՆ-ի ու Իրանի երկխոսությունը: Ենթադրվում է, որ իրանական նավթը Եվրոպա կհասնի բավականին մատչելի գներով, գոնե սկզբնական շրջանում, ինչն այդ շուկայում մեծ խնդիրներ կառաջացնի մրցակիցների համար: