Նախիջևանի ուղղությամբ կրակոցների մասին կեղծ հայտարարությամբ Ադրբեջանը նոր սադրանք է հրահրում
Բաքուն հայտարարել է, թե Նախիջևանի ուղղությամբ ադրբեջանցի զինծառայող է վիրավորվել: Համարվում է, որ Ադրբեջանն այս հայտարարությամբ հող է նախապատրաստում Նախիջևանի կողմից Սյունիքի վրա հարձակվելու համար:
Ադրբեջանի պաշտպանության նախարարությունը հայկական կողմին մեղադրել է Նախիջևանի ուղղությամբ տեղակայված իրենց դիրքերի վրա կրակոցներ արձակելու մեջ: Բաքվում հայտարարել են, թե ադրբեջանցի զինծառայող է վիրավորվել, պատասխան կրակ են բացել` «լռեցնելով հայկական ուժերին»:
Համարվում է, որ Ադրբեջանն այս հայտարարությամբ հող է նախապատրաստում Նախիջևանի կողմից Սյունիքի վրա հարձակվելու համար:
ՀՀ պաշտպանության նախարարությունն ադրբեջանական կողմի հրապարակումը հերթական բացահայտ սուտ է որակել` նշելով, որ Հայաստանի Հանրապետության զինված ուժերը Նախիջևանի ուղղությամբ կրակ չեն բացել։
ՊՆ համոզմամբ` ըստ ամենայնի` ադրբեջանցի զինծառայողի վիրավորվելու պատճառները պետք է փնտրել Ադրբեջանի զինված ուժերի զինծառայողների ներանձնային փոխհարաբերությունների որակներում և կարգապահության հետ կապված խնդիրներում։
Մեկնաբանությունները