Խորեն Հովհաննիսյանը մտադիր է ղեկավարել ֆուտբոլի ֆեդերացիան

Խորեն Հովհաննիսյանը հայտնել է, որ պատրաստվում է Հայաստանի ֆուտբոլի ֆեդերացիայի նախագահի պաշտոնում առաջադրել իր թեկնածությունը: Խորհրդային Միության հավաքականի և Երևանի «Արարատ 73»-ի երբեմնի լավագույն ֆուտբոլիստը ափսոսանք է հայտնել հայկական ֆուտբոլի ներկայիս վիճակի մասին:

Հովհաննիսյանը նշել է, որ իր թեկնածությունն առաջադրում է հանուն լավ ֆուտբոլի, հայկական ֆուտբոլը զարգացնելու և Հայաստանը ֆուտբոլային երկիր դարձնելու: Վաստակավոր մարզիկը հայտնել է, որ երկար ժամանակ ֆուտբոլում է, զբաղվում է ֆուտբոլով:

Միջազգային կարգի սպորտի վարպետը ԽՍՀՄ առաջնության բարձրագույն խմբում հանդես է եկել Երևանի «Արարատի» (1975-1985թթ.) և Տաշքենդի «Պախտակորի» (1991) ակումբներում։ Խորեն Հովհաննիսյանն «Արարատի» կազմում անցկացրել է 295 խաղ, խփել 93 գոլ։ Ընդհանուր առմամբ խփել է 113 գոլ։

ՀՀ վաստակավոր մարզիչն Օլիմպիական խաղերի բրոնզե մեդալակիր է (1980թ.), Եվրոպայի երիտասարդական առաջնության հաղթող (1976թ.), ԽՍՀՄ 1976 թ. գարնանային առաջնության արծաթե մեդալակիր։ 1979-1984 թթ. հանդես է եկել ԽՍՀՄ գլխավոր հավաքականում (37 խաղ, 8 գոլ)։ Հայաստանի ֆուտբոլիստներից առաջինն է, որ մասնակցել է աշխարհի առաջնության եզրափակիչ փուլի (1982թ.)՝ դառնալով 1 գոլի հեղինակ։

Խորեն Հովհաննիսյանը մարզչի պաշտոնում ղեկավարել է Երևանի ՀՄԸՄ և «Փյունիկ» թիմերը, մարզել է Բեյրութի ՀՄԸՄ-ն, 1996-1997 թթ. գլխավորել է Հայաստանի ազգային հավաքականը:

Հիշեցնենք՝ նոյեմբերի 21-ին Արթուր Վանեցյանը հրաժարական էր ներկայացրել Հայաստանի ֆուտբոլի ֆեդերացիայի նախագահի պաշտոնից: Գործադիր կոմիտեն ընդունել էր հրարականը՝ հայտարարելով, որ սկսվում է հայկական ֆուտբոլի մաքրման գործընթացը: Նոր գործկոմ և ֆեդերացիայի նախագահ կընտրվեն դեկտեմբերի 23-ին: