2020թ. Հայաստանում 2 դիակիզարան կհիմնվի
Դիակիզումն ավանդական հուղարկավորությունից ավելի քիչ ծախսեր է պահանջում: Բացի այդ, Երևանում գերեզմանոցներն արդեն բավականին մեծ տարածք են զբաղեցնում: Ոլորտն ուսումնասիրվել է. պահանջարկ կա:
«Բնակչության հատուկ սպասարակում» ՀՈԱԿ-ի տնօրեն Արման Իսկանդարյանը հայտնել է, որ ներդրողներն ուսումնասիրել են ոլորտը և եկել են այն եզրակացության, որ Հայաստանոում առկա է դիակիզարան ունենալու պահանջարկ: Նրա խոսքով՝ 2020թ. ՀՀ-ում կբացվի միանգամից 2 դիակիզարան:
ՀՈԱԿ տնօրենը նշել է, որ այդ ոլորտի օրենսդրությունն ուսումնասիրվել է և արձանագրվել, որ օրենքի հետ կապված խնդիր չկա: Իսկանդարյանի խոսքով՝ ներդրողներ կան, ովքեր պատրաստ են գումար հատկացնել այդ ոլորտի համար: Առանձնահատկությունը կայանում է նրանում, որ դիակիզումն ավանդական հուղարկավորությունից ավելի քիչ ծախսեր է պահանջում: Բացի այդ, Երևանում գերեզմանոցներն արդեն բավականին մեծ տարածք են զբաղեցնում:
Երևանում գործող 21 գերեզմանատների զբաղեցրած տարածքը 530 հա է: 2019թ. դրությամբ մայրաքաղաքում կա 90 պուրակ և զբոսայգի՝ ընդհանուր 213 հա տարածքով: Ստացվում է՝ գերեզմաններն ավելի շատ տարածք են զբաղեցնում, քան կանաչ տարածքները: Ըստ Իսկանդարյանի՝ միայն Երևանում տարեկան 1,8 հա է հատկացվում գերեզմանոցներին:
ՀՈԱԿ տնօրենը նշել է, որ ներկայումս հողամասերն անվճար են հատկացվում, և մարդիկ հաճախ չարաշահում են դա՝ զբաղեցնելով ավելի շատ տարածք: Նրա խոսքով՝ Երևանում գերեզմանների հետագա «աճը» կանխելու լավագույն տարբերակը հողամասը վճարովի դարձնել է:
Բացի հողի խնդիրը, Իսկանդարյանը հավելել է նաև, որ մարդիկ պետք է ընտրության հնարավորություն ունենան՝ անկախ եկեղեցու կամ որոշ քաղաքացիների մոտեցումից: Նրա խոսքով՝ եղել են դեպքեր, երբ մարդիկ Հայաստանում նման ծառայության բացակայությամբ պայմանավորված, դին տարել են Մոսկվա, այնտեղ են հրկիզել են և վերադարձել:
Մեկնաբանությունները