Հայաստանի և Սփյուռքի միջև խորն անվստահության մթնոլորտ է տիրում. Սինանյան

Հայաստանի սփյուռքի գործերի գլխավոր հանձնակատար Զարեհ Սինանյանը հայտարարել է, որ 2020թ. Արցախյան պատերազմից հետո շուրջ 6 ամիս արտասահմանի հայ համայնքի կողմից Հայաստանին ցուցաբերվող ֆինանսական աջակցության հարցը Սփյուռքում ամենաշատ քննարկվող թեման է եղել:

Նրա խոսքով՝ գումարներ են հավաքվել որոշակի նպատակով, որոնց մի մասը ծախսվել է պատերազմի համար: Այդ պատճառով, ինչպես նշում է, այդ հարցն ի սկզբանե համարել է կեղծ թեմա:

Սակայն Հայաստանի և սփյուռքի միջև, Սինանյանի կարծիքով, խորն անվստահության մթնոլորտ է տիրում: Որպես տևական ժամանակ Միացյալ Նահանգներում բնակված հայ՝ վստահեցրել է, որ հավաքված, ապա տարբեր կազմակերպությունների միջոցով Հայաստանին փոխանցված գումարը սփյուռքի հնարավորությունների նույնիսկ աննշան տոկոսը չի կազմում:

Զարեհ Սինանյանը նաև պնդել է, որ հայերը չպետք է այլևս սփյուռքի կարողությունները գնահատեն ըստ ցուցաբերվող ֆինանսական աջակցության, քանի որ այս երևույթը բարդացնում է արտասահմանյան հայ համայնքների հետ հարաբերությունները:

Նրա համոզմամբ՝ սփյուռքն ավելին կարող է տալ Հայաստանին, քան այդ գումարը: Գլխավոր հանձնակատարի խոսքով՝ փոխադարձ ընդունելի և հարգալից հարաբերություններ հաստատվելու դեպքում միայն ակնհայտ կդառնան սփյուռքի իրական կարողությունները Հայաստանի բոլոր ոլորտներում:

Հիշեցնենք, որ նախորդ տարվա նոյեմբերի սկզբին, Արցախյան պատերազմից օրեր առաջ, հաղորդվել է, որ «Հայաստան» համահայկական հիմնադրամին Արցախին աջակցության տրամադրման շրջանակներում փոխանցված գումարի չափը կազմել է շուրջ 140 մլն դոլար: