Պատերազմի մասնակիցը պատմել է Շուշի տանող ճանապարհի գյուղերից նահանջելու մանրամասները

Աշխարհագետ, Armenian Geographic-ի (ArmGeo) հիմնադիր Տիգրան Վարագը, ով նույնպես մասնակցել է Արցախյան վերջին պատերազմին, հարցազրույցում մանրամասներ է ներկայացրել հայկական կողմի կրած պարտության, ինչպես նաև Շուշիում հակառակորդի ուժերի հայտնվելու մասին:

Տիգրանի խոսքով` իրենց 30 հոգանոց խումբը հրամանատար չի ունեցել, առանց զինպատրաստություն անցնելու մեկնել է Արցախ: Նրանց հրահանգվել է ընտրել հրամանատար և պաշտպանել Մոխրենես գյուղը: Գյուղում նույնպես չեն եղել զինվորականներ, ովքեր տեղանքին ու հայկական դիրքերի տեղակայմանը քաջածանոթ կլինեին:

Տեղի բնակիչներից մի քանիսի օգնությամբ դիրքավորվել են գյուղի մատույցներում, սակայն գիշերը զանգել և ասել են` շտապ թողնել դիրքերը, քանի որ թշնամին արդեն հարևան Տող գյուղում է: Գիշերն անցկացրել են գյուղում` սպասելով հակառակորդին, քանի որ Տողը Մոխրենեսից ընդամենը 3 կմ հեռավորության վրա է:

Առավոտյան մի սպա է եկել Մոխրենես և հայտնել, որ Տողի անկման մասին տեղեկություններն իրականությանը չեն համապատասխանում, սկսել է խորոված պատրաստել: Սակայն շուտով պարզվել է, որ թշնամին Տողում է և շարժվում է դեպի Մոխրենես: Սպան կապ է հաստատել գեներալի հետ: Վերջինս հրամայել է նահանջել Տումի գյուղի ուղղությամբ:

Այնուհետև տղաները նահանջել են մինչև Քիրսավան: Այնտեղից հայտնվել են Քարին Տակում` Շուշին պաշտպանելու: Սակայն այստեղ նույնպես դիրքերը թողնելու և նահանջելու հրաման են ստացել:

Տիգրանը եզրակացնում է, որ նման իրավիճակ է ստեղծվել, քանի որ դեպի Շուշի տանող ճանապարհին ընկած բնակավայրերը պահպանելու նպատակ չի դրվել: Նրա կարծիքով` նահանջի հրամանները նախապես ծրագրված էին: