Օդի փողը կհանվի. Տաթևիկ Ռևազյանը խոստացել է

Քաղավիացիայի կոմիտեի նախագահ Տաթևիկ Ռևազյանը պաշտոնավարման 1-ամյակի ամփոփմանը նվիրված մամուլի ասուլիսի ժամանակ անդրադարձել է օդի փող հասկացությանը։ Ռևազյանը նշել է, որ նախատեսում են հանդես գալ օրենսդրական փոփոխություններով, որոնք միտված են լինելու գնային քաղաքականության կարգավորմանը։

Քաղավիացիայի կոմիտեի նախագահը հայտարարել է, որ փոփոխությունների արդյունքում օդի փողը՝ ֆիքսված 10 հազար դրամը հանվելու է Պատճառն այն է, որ օդի փողը ոչ միայն խնդիր է ուղևորների համար, քանի որ առաջացնում է հավելյալ ծախս՝ ազդելով տոմսի արժեքի վրա, այլև խոչընդոտում է նոր ավիաընկերությունների մուտքը։

Տաթևիկ Ռևազյանն անդրադարձել է նաև ռուս-վրացական օդային հաղորդակցության դադարեցմանը, ինչպես նաև Հայաստանի միջոցով այդ կապն ապահովելուն ուղղված միջոցառումներին։ Ինչպես ավելի վաղ հաղորդել էինք, այդ հարցում նշանակալի իրադարձություն էր Արմենիա ավիաընկերության վերագործարկումը և դեպի Մոսկվա շաբաթական 14 թռիչքի իրականացումը հուլիսի 8-ից։

Կոմիտեի ղեկավարը նշել է, որ օդի փողը հանելու և ընդհանրապես Զվարթնոց-ի սակագներում հնարավոր այլ զեղչերի դեպքում միայն Հայաստան կգան այլ ավիաընկերություններ։ Դրանցից են Ռյանէյր-ը (Ryanair) և Վիզէյր-ը (Wizz Air), որոնք շուկա կմտնեն 2020թ․ գարնանը։

Տաթևիկ Ռևազյանը խոստացել է, որ օրենսդրական փոփոխությունների արդյունքում օդը փողը կհանվի նաև մյուս ավիաընկերությունների համար։

Օրենքի մասին

Պետական տուրքի մասին օրենքում փոփոխությունները կատարվել են դեռևս 2008։ Դրանց համաձայն՝ 2009թ․ մարտի 29-ից ՀՀ-ից օդային տրանսպորտի միջոցով ֆիզիկական անձանց ելքի համար գանձվող պետական տուրքի գումարները մտնում են փոխադրման (տոմսի) արժեքի մեջ։ Այն չեն վճարում միայն՝
ա) մինչև 12 տարեկան երեխաներին.
բ) տարանցիկ ուղևորներին․
գ) Հայրենական մեծ պատերազմի մասնակիցներին և նրանց հավասարեցված անձանց․ Հայրենական մեծ պատերազմի հաշմանդամներին եւ նրանց հավասարեցված անձանց․ Հայրենական մեծ պատերազմի 1-ին խմբի հաշմանդամին ուղեկցող անձին․ Հայրենական մեծ պատերազմում զոհվածների այրիներին․ Խորհրդային Միության հերոսներին և Փառքի երեք աստիճանների շքանշաններով պարգևատրված անձանց․ Հայաստանի Հանրապետության ազգային հերոսներին․
դ) Հայաստանի Հանրապետության օդանավակայաններից մինչեւ 450 կիլոմետր շառավղով օդային փոխադրումների իրականացման դեպքում օդային տրանսպորտի միջոցով մեկնող ֆիզիկական անձանց: