Հայաստան-Իրան բիզնես ֆորումը մեկնարկել է. արդեն պայմանավորվածություններ կան

Երևանում հունիսի 29-ին մեկնարկել է  Հայաստան-Իրան բիզնես ֆորումը, որի շրջանակներում գործարարներն առևտրային կապերի ամրապնդման բանակցություններ են սկսել:

Բիզնես ֆորումին մասնակցում է Իրանի բարձր տեխնոլոգիական ընկերությունների պատվիրակությունը` բաղկացած Իրանի 25-ից ավելի ընկերությունների ներկայացուցիչներից: Ֆորումում ներկայացված են իրանական 10 և հայկական 40 ընկերություններ:

Մասնավորապես, «Rhyton Solutions» ընկերության տնօրեն Մասուդ Հասանին նշել է, որ առաջին անգամ են Հայաստանում, սակայն համագործակցության փորձ ունեն։ Նրա խոսքով` հայկական կողմից տեղեկատվական տեխնոլոգիաների ոլորտում ծրագրային պատվեր նախկինում եղել է, որն իրականացրել է իրանական ընկերությունը:

Ֆորումից հետո, Հասանիի համոզմամբ, հնարավոր է նոր` ավելի մեծ ծրագրերի իրականացում տարբեր ձևաչափերում: Նա հույս է հայտնել նաև, որ երկու երկրի համագործակցության շնորհիվ հնարավոր կլինի համաշխարհային շուկայում նույնպես առաջխաղացում ունենալ: Հասանին հավելել է, որ օրվա ընթացքում բազմաթիվ հանդիպումներ են նախատեսված ՏՏ ոլորտի տարբեր ընկերությունների հետ։

Մասնակիցներից Էմադե Ասկարիեն, ով նույնպես ՏՏ ոլորտն է ներկայացնում, շեշտել է, որ նպատակ ունեն երկու երկրի միջև համագործակցությունն էլ ավելի բարձրացնել։ Նրա խոսքով` մտադրություն ունեն Հայաստանում արտադրություն սկսել, ապա` հայկական ընկերությունների հետ մուտք գործել համաշխարհային շուկա։

Շինանյութերի սերտիֆիկացմամբ և լաբորատոր փորձարկումներով զբաղվող «Փ․Աբաջյան» ՍՊԸ տնօրեն Փիրուզա Աբաջյանի խոսքով` իրենց հետաքրքրել է իրանական ցեմենտը, որն արտադրվում է ու ներմուծվում է Հայաստան։ Տնօրենն ընդգծել է, որ բազմիցս հանդիպել են իրանական կողմի հետ, իսկ ֆորումի շրջանակներում փորձում են համագործակցության եզրեր գտնել նրանց հետ: