Նյու Յորքի նախկին քաղաքապետը մեղադրվում է Թուրքիայի օգտին գործելու մեջ

Ինչպես հաղորդվում է, Ռուդի Ջուլիանիի նկատմամբ ԱՄՆ-ի արդարադատության նախարարությունում հետաքննություն է իրականացվում Թուրքիայի օգտին հնարավոր լոբբինգի և Ուկրաինայում իր գործունեության կապակցությամբ:

Նյու Յորքի նախկին քաղաքապետից և Դոնալդ Թրամփի անձնական փաստաբանից հետաքրքրվում են` արդյո՞ք նրանք գործել են Թուրքիայի օգտին, երբ 2017թ. Թրամփի վարչակազմին դրդել են հանել փողերի լվացման մեղադրանքները ոսկեվաճառ Ռեզա Զառաբայի վրայից, արդյո՞ք փորձել են նպաստել մուսուլմանական հոգևոր ծառայող Ֆեթուլա Գյուլենի արտաքսմանը: Հաղորդվում է, որ ավելի ուշ Զառաբն իրեն մեղավոր է ճանաչել և Թուրքիայի նախագահին մեղադրել է պատժամիջոցներից խուսափելու մեջ, այն դեպքում, երբ Էրդողանը պնդում էր, թե Գյուլենն է կանգնած 2016թ. Թուրքիայում ռազմական հեղաշրջման փորձի կազմակերպման հետևում:

Ջուլիանիի փաստաբան Ռոբերտ Կոստելլոյի խոսքով` իր պաշտպանյալը երբեք չի ձգտել հոգևորականի արտաքսմանը և չի ներկայացրել Թուրքիայի շահերը: Իսկ Թուրքիայի հետ շփումը նա պայմանավորել է Զառաբին մեկ այլ հոգևորական Էնդրյու Բրանսոնի (ձերբակալվել էր Թուրքիայում) հետ փոխանակելու շուրջ քննարկումներով:

Ջուլիանին նույնպես հերքել է Թուրքիայի կամ Ուկրաինայի օգտին լոբբիի մեղադրանքը: Ինչպես նշվում է, եթե կառավարությունը որոշի, որ Ջուլիանին գործել է հօգուտ օտարերկրյա շահերի, ապա նա կհամարվի լոբբիստ և կպարտավորվի ներկայացնել մանրամասները, շփումները, որոնք նա ունեցել է նշված հարցերի շուրջ:

Բացի Թուրքիայի և Ուկրաինայի հետ կապված հետաքննություններից, Ջուլիանին ընտրակեղծիքների մասին տարածած կեղծ լուրերի պատճառով զրկվել է Նյու Յորքի հավաստագրից: Նա մեղադրվում է նաև հունվարի 6-ին Կապիտոլիումի անկարգությունների կազմակերպման մեջ: