Քաղաքագետը համեմատել է Փաշինյանի և Լուկաշենկոյի՝ ընդդիմության դեմ պայքարի մեթոդները

Տեղեկատվական-վերլուծական «Կասսադ» կենտրոնի գլխավոր խմբագիր Բորիս Ռոժինն ընդհանրություններ է գտել Հայաստանի վարչապետի և Բելառուսի նախագահի գործողություններում, որոնք ուղղված են ընդդիմության դեմ: Նրա խոսքով՝ Նիկոլ Փաշինյանն ընդդիմադիրների դեմ պայքարում կարող է կիրառել միայն իր համբերության ուժը:

Քաղաքագետը, անդրադառնալով վերջին ամիսներին Հայաստանում տեղի ունեցող գործընթացներին, իշխող ուժի և հատկապես Փաշինյանի հրաժարականի պահանջով բողոքի ցույցերին, գործադուլներին, ճանապարհները փակելուն, հիշեցրել է, որ գրեթե նույն կերպ էլ Նիկոլ Փաշինյանն էր եկել իշխանության՝ պահանջելով Սերժ Սարգսյանի հրաժարականը:

Ռոժինի խոսքով՝ Հայաստանում իշխանության ղեկավարի փոփոխությունն արագացնելու նպատակով ընդդիմադիրները տեղեկատվական դաշտ են նետում լուրեր, ըստ որոնց՝ Նիկոլ Փաշինյանը պատրաստվում է հրաժարական ներկայացնել Նոր տարուց հետո կամ արդեն տվել է:

Սակայն պաշտոնական մակարդակներում նման բան չկա: Փորձագետի խոսքով՝ ոչ մի պայմանական Վազգեն Մանուկյանի Փաշինյանը չի պատրաստվում իշխանություն հանձնել: Ընդհանուր առմամբ՝ ստեղծված քաղաքական ճգնաժամից դուրս գալու համար փորձագետն անհրաժեշտ է համարել անցկացնել արտահերթ խորհրդարանական ընտրություններ, սակայն վստահությամբ նշել է, որ Հայաստանի վարչապետը նաև այս հարցում չի շտապի:

Ռոժինի համոզմամբ՝ Փաշինյանն այլ տարբերակ չունի, քան պարզապես «նստել ու սպասել», մինչև բողոքի ցույցերն իրենք իրենց կմարեն:

Նրա խոսքով՝ այդ ճանապարհը բոլորին է հայտնի. գրեթե նույն մեխանիզմն է գործադրել նաև Ալեքսանդր Լուկաշենկոն, ընդ որում՝ բավականին հաջողված կերպով: «Դեղին բաճկոնների» բողոքի ցույցերը Ֆրանսիայում նույնպես նշված մոդելով հաղթահարվեցին և Էմանուել Մակրոնը չընկրկեց, այնպես որ, քաղաքագետի խոսքով, Հայաստանի վարչապետն իշխանությունը պահելու այս գործելաոճի՝ «պարզապես սպասելու» մի քանի հաջողված փորձեր ունի աչքի առաջ: Հատկապես, երբ նրա հակառակորդները երկրում մեծ աջակցություն չեն վայելում, իսկ ընդդիմության ղեկավարների նկատմամբ որոշակի բացասական վերաբերմունքը գերիշխում է:

Քաղաքագետը նշել է, որ Հայաստանի ժողովուրդը տհաճ երկընտրանքի առաջ է կանգնած. մի կողմից չի կարող հանդուրժել իրեն չարդարացրած Փաշինյանին, մյուս կողմից՝ ավելի լավ տարբերակ առաջադրված չէ:

Սակայն, Ռոժինի խոսքով, ամեն դեպքում որոշում պետք է կայացնել. որքան ձգձգվի այս ճգնաժամը, այնքան երկրի համար հետագայում հետևանքները լուրջ կլինեն. Հայաստանի քաղաքական կառուցվածքը կարող է պարզապես չդիմակայել այդպիսի ճնշմանը: