Փորձագետ. սկզբնական փուլի՝ դիմակների անարդյունավետության մասին կոչերում իշխանություններն այնքան էլ մեղավոր չեն

Դեռևս փետրվարի վերջերին և մարտի սկզբներին, երբ կորոնավիրուսն արագ տեմպերով տարածվում էր աշխարհով մեկ, բուռն քննարկվում էր դիմակներ կրելու հարցը: Մասնագետներն այդ օրերին հորդորում էին փողոցներում և բաց տարածքներում դիմակներ չկրել, քանի որ դրանք այդ պայմաններում արդյունավետ չեն:

ՀՀ Առողջապահության նախարար Արսեն Թորոսյանը նույնպես այդ շրջանում նշում էր, որ դիմակներ պետք է կրեն ախտանշաններ ունեցող անձինք, հիվանդների հետ աշխատող բժիշկներն ու խնամողները: Նախարարը նաև հորդորում էր չսպառել դեղատներում առկա դիմակները, քանի որ դրանք կարող են անհրաժեշտ լինել բուժանձնակազմի համար: Չնայած դրան՝ Հանրապետությունում և գրեթե մյուս բոլոր երկրներում առաջացավ դիմակի պակասորդ:

Ամիսներ առաջ Առողջապահության համաշխարհային կազմակերպության և առողջապահական այլ կազմակերպություններ կորոնավիրուսի տարածման կանխարգելման միջոցառումների շարքում սովորական քաղաքացիների կողմից դիմակ կրելը կարևոր պայման չէին համարում: Սակայն ներկայումս իրավիճակը փոխվել է. դիմակը կարող է կյանքեր փրկել:

Մայիսի 25-ից Հայաստանում պարտադիր պայման է դարձել առևտուր անելիս, կանգառում, մեքենայում, փակ տարածքում դիմակ կրելը (հանրային տրանսպորտում այդ պահանջը մայիսի 18-ից է գործում): Իսկ դիմակի պակաս Հայաստանն այսօր չունի. բացի այն, որ մեծածավալ արտադրություն է մեկնարկել, հնարավոր է տան պայմաններում պատրաստել՝ չգնելով համեմատաբար թանկարժեքը: Ի դեպ՝ դիմակ չկրելու համար սահմանված տուգանքը 10 հազար դրամ է:

Եթե նախկինում սովորական դիմակները համարվում էին անօգուտ, ապա այժմ առողջապահական միջազգային կազմակերպություններն ու հետազոտողները նշում են, որ օդակաթիլային ճանապարհով տարածվող կորոնավիրուսից պաշտպանվելու հարցում այն բավականին արդյունավետ է: Ռուսական գիտական հանրահայտ պարբերականներից Naked Science-ի գլխավոր խմբագիր Ռուսլան Մարտիրոսյանի խոսքով՝ դիմակների և՛ անարդյունավետության, և՛ անհրաժեշտության մասին հայտարարությունների սկզբնաղբյուրն ԱՀԿ-ն է, և որ չպետք է շատ մեղադրել Թորոսյանին:

Ինչպես ՀՀ առողջապահության նախարարը, այնպես էլ, օրինակ, ամերիկացի մասնագետները, նշել են, որ նախկինում դիմակների սահմանափակ քանակն է եղել դրանց անարդյունավետության մասին հայտարարությունների պատճառը, սակայն ներկայումս այդ բացը լրացվում է, և նպատակահարմար է, որ բնակչությունը, բացի սոցիալական հեռավորությունից, ձեռքերը պարբերաբար լվանալուց, նաև դեմքը ծածկի:

Բազմաթիվ քաղաքացիներ, օգտատերեր դիմակներ կրելու վերաբերյալ որոշումներից հետո մատնանշում էին նախարարի խոսքերը՝ փետրվար-մարտ ամիսների՝ անհիմն համարելով ներկայիս պահանջը: Սակայն, ինչպես տեսնում ենք, բազմաթիվ հայտարարություններ հնչել են ԱՀԿ-ի, ԱՄՆ Հիվանդությունների կանխարգելման կենտրոնի (CDC) և առողջապահական այլ կառույցների ցուցումների վրա հիմնվելով: Ուստի իշխանություններին տարաբնույթ հայտարարությունների մեջ մեղադրելն այնքան էլ տեղին չէ՝ հաշվի առնելով նաև Covid-19-ի առանձնահատկությունները: