Hubble աստղադիտարանը հաստատել է 2I/Borisov միջաստղային գիսաստղի կառուցվածքի փոփոխությունները

Մարտի սկզբին Լեհաստանի Յագելոնյան համալսարանի աստղագետները նկատել էին 2I/Borisov ոչ մեծ գիսաստղի 2 փայլատակում: Գիսաստղը երկրորդ միջաստղային օբյեկտն է (առաջինը 1I/Օումուամուա աստերոիդն է), որը մեզ մոտ է եկել օտար համակարգից և հայտնաբերվել է 2019թ. օգոստոսին: Նախորդ շաբաթ գիտնականները հայտարարել են, որ, հավանաբար, 2I/Borisov-ը դեկտեմբերին արևին մոտենալուց հետո սկսել է բաժանվել մասերի. գիստաստղի միջուկը տաքանում է, ակտիվանում և սկսում բաց թողնել մեծ քանակությամբ թռչող նյութեր՝ ջրային գոլորշի, ածխաթթու և այլ գազեր, նաև փոքր ու մեծ փոշեհատիկներ:

Այդ ժամանակվանից հետո աստղագետները շարունակել են գիսաստղի դիտարկումները: Օրերս Լոս Անջելեսի Կալիֆորնիական համալսարանի գիտնականները, ովքեր վաղուց ուսումնասիրում են 2I/Borisov-ը, զեկույց են հրապարակել, ըստ որի՝ Երկրի ուղեծրում գտնվող ինքնաշխատ աստղադիտարանը՝ Hubble-ը, հաստատել է կտրուկ փոփոխությունները գիսաստղի կառուցվածքում. եթե սկզբում այն լուսանկարներում մեկ կետի նման էր, ապա այժմ դարձել է երկայնաձիգ: Ավելին, հետազոտողները վստահ են, որ գիսաստղի միջուկը երկու մասի է բաժանվել:

Դևիդ Ջուիթի ղեկավարած գիտական խումբը հայտարարել է, որ Hubble աստղադիտարանի կողմից միջաստղային 2I/Borisov մարմնի շարունակվող դիտարկումներն ապացուցել են նրա ուրվագծում կտրուկ փոփոխությունները: Մարտի 30-ին ստացված լուսանկարները ցույց են տալիս, որ նրա միջուկն այժմ երկու մարմիններից է կազմված, որոնք միմյանցից մոտ 180 կիլոմետր են հեռու: Նրանց շարժման արագությունը համապատասխանում է նրան, թե ինչ արագությամբ են շարժվում Արեգակնային համակարգի գիստաստղի բաղադրամասերը միջուկի մասնատումից հետո:

Միջաստղային գիսաստղի ֆրագմենտավորման վերաբերյալ եզրակացության հետ համաձայնել են նաև Կալտեխի և NASA-յի գիտնականները: Հաղորդվում է, որ 2020թ. մարտի 23-ին և մարտի 28-ին ստացված լուսանկարներում երևում է ոչ մեծ ֆրագմենտ, որը բաժանված է հակաարևային ուղղության մոտ 0,3 անկյունային վայրկյանի: Մեծ կենտրոնի և ֆրագմենտի միջև հեռավորությունը մարտի 23-ից 28-ի դիտարկումներով փոփոխվում է 1-2 պիքսելով:

Չնայած այն հանգամանքին, որ 2I/Borisov-ն ակնհայտորեն այն նույն անխուսափելի կործանմանն է արժանանալու, ինչ որ բազմաթիվ այլ գիստաստղեր, այնուամենայնիվ՝ աստղագետները լիահույս են. մասնատումից հետո հետազոտողները կշարունակեն դիտարկումները և կկարողանան ուսումնասիրել նրա լուսապատկերը՝ հասկանալու, թե ինչից է բաղկացած միջաստղային մարմինը և տարբերվում է արդյոք Արեգակնային համակարգի գիստաստղերից: