«Մենք ոչ միայն Արցախում ենք պարտվել հայերին, այլև՝ ամենուր» ,— ադրբեջանցի գրող

Շվեդիայում բնակվող ադրբեջանցի գրող-հրապարակախոս Վահիդ Գազին բաց նամակ է հղել՝ նշելով, որ «Պատերազմի քամիներ» համերգի ցուցապաստառի վրա՝ եվրոպական երաժշտության դասականների շարքում, տեսել է նաև Արամ Խաչատրյան անունը:

Գազիին այս դիպվածը հիշեցրել է իր մանկությունը, երբ խորհրդային ֆիլմերի ու հաղորդումների տիտրերում փնտրել է ադրբեջանական ազգանուններ: Ու երբ գտել է, չի հասկացել՝ ադրբեջանակա՞ն է, թե՞ մուսուլման այլ ժողովրդի: Միաժամանակ, հայկական ու վրացական ազգանունների այնտեղ շատ է հանդիպել:

Գազիի խոսքով՝ միայն Արցախում չի, որ ադրբեջանցիները պարտվել են: Գրողն ընդգծել է, որ իր ժողովուրդը պատերազմում պարտվել է մարշալ Բաղրամյանին և մարշալ Բաբաջանյանին, քաղաքականության մեջ՝ Միկոյանին, այլախոհությամբ՝ Պարույր Հայրիկյանին, իրավունքների պաշտպանության ոլորտում՝ Ալիխանյան-Բոններին, դասական երաժշտությունում՝ Արամ Խաչատրյանին, ժամանակակից երաժշտությունում՝ Միշել Լեգրանին, ջութակի ասպարեզում՝ Սամվել Երվինյանին, դուդուկի՝ Ջիվան Գասպարյանին, ուդի դեպքում՝ Ջոն Բերբերյանին, էստրադայում՝ Շարլ Ազնավուրին, գրականությունում՝ Վիլյամ Սարոյանին, գեղանկարչությունում՝ Այվազովսկուն, կինոյում՝ Փարաջանովին, դերասանական ոլորտում՝ Ջիգարխանյանին, մոդելային բիզնեսում՝ Քիմ Քարդաշյանին, վաստակելու ունակությամբ՝ Քըրք Քըրքորյանին, բարեգործությամբ՝ Ջերարդ Գաֆեսճյանին, կոնստրուկտորական գործում՝ Արտեմ Միկոյանին, աստղաֆիզիկայի ոլորտում՝ Վիկտոր Համբարձումյանին:

Շվեդիայում բնակվող գրող-հրապարակախոսը նշել է նաև, որ ադրբեջանցիներն այս ամենի պատճառ են համարում հայկական կեղծարարությունը, սուտը, խարդախությունը, քրիստոնեությունը, եկեղեցին, նշանակությունը Ռուսաստանի, Իրանի, ԱՄՆ-ի համար, դավաճանությունը, սակայն երբեք պատճառն իրենց մեջ չեն փնտրում:

Գազին ընդգծել է, որ վերոնշյալ անձանցից յուրաքանչյուրը հաջողության, համաշխարհային ճանաչման է հասել և իր ժողովրդին հայտնի դարձրել՝ թիկունքին ունենալով բազմաթիվ ազգակիցներ, համախմբված համայնք:

Վահիդ Գազիի համոզմամբ՝ հայերն իրար ձեռք են մեկնում, գիտության, քաղաքականության, մշակույթի, սպորտի, ռազմական ոլորտներում և ամենուր մեկ հայի օգնում են հինգը՝ վեր բարձրացնելով և թիկունքին ամուր կանգնելով: Այդ պատճառով, գրողի խոսքով, հայկական ազգանունների կարելի է հանդիպել Նյու Յորքի գլխավոր փողոցներում և նույնիսկ Շվեդական գյուղական փոքր գրադարանում: