Մուրադյանը համարվում էր Շրջակա միջավայրի նախարարի համակրելին ու ԱԺ պատգամավորի հովանավորյալը, և տարօրինակ է, որ հենց նա էլ նշանակվեց «Արփի լիճ» ազգային պարկի տնօրեն:
«Արփի լիճ» ազգային պարկի տնօրենի պաշտոնի համար հայտարարվել էր մրցույթ: Հայտնի էր, որ մրցույթի անցողիկ շեմը հաղթահարել է 13 թեկնածուներից 7-ը: Սակայն մամուլում տեղեկություններ էին տարածվել, որ Շրջակա միջավայրի նախարարը մտադիր է տնօրեն նշանակել մրցույթի արդյունքներով 5-րդ հորիզոնականը զբաղեցրած թեկնածուին: Հաղորդվել էր նաև, որ նախընտրելի թեկնածուն Շիրակի նախկին մարզպետ, ներկայումս ԱԺ «Իմ Քայլը» խմբակցության պատգամավոր Կարեն Սարուխանյանի հովանավորությունը վայելող Մուշեղ Մուրադյանն է:
Օրեր առաջ մամուլում շրջանառվող տեղեկությունները, թեև հերքվեցին և՛ նախարարության, և՛ պատգամավորի կողմից, այնուամենայնիվ հաստատվեցին այնքանով, որ տնօրեն նշանակվեց հենց Մուրադյանը:
Դեկտեմբերի 18-ին տնօրենի թափուր պաշտոնի հավակնորդների բանավոր քննությունը (10 հարց, անցողիկ շեմը՝ 70%) թեկնածուներից հաղթահարել են Պետրոսյան Արան՝ 91%, Մարտիրոսյան Միասնիկը՝ 85%, Իգիթյան Արմենը՝ 84%, Գալոյան Հրաչը՝ 83%, Մուրադյան Մուշեղը՝ 81%, Խաչատրյան Հմայակը՝ 76%, Հարությունյան Վարդանը՝ 70,5% միավորներով: Մեր տեղեկություններով՝ Շիրակի մարզպետարանի ներքին աուդիտի բաժնի պետ Մուրադյան Մուշեղն արդեն նշանակվել է Պարկի տնօրեն:
Մամուլում շրջանառվող տեղեկությունների համաձայն՝ մյուս թեկնածուներն իրենց մասնագիտական ունակություններով ավելի նպատակահարմար պետք է որ լինեին: Օրինակ, Գալոյանն Աշոցքի տարածաշրջանի ԱԱԾ-ի նախկին պետն է, 1 ամիս առաջ է նշանակվել Գյումրու երկաթգծի կայարանի անվտանգության պետ, Խաչատրյանը ՋՕԸ-ի նախկին բաժնի պետերից է:
Հայտնի օդաչու, պահեստազորի փոխգնդապետ Մ. Մարտիրոսյանը կանգնած է հայկական ավիացիայի կազմավորման ակունքներում, երկար ժամանակ զբաղեցրել է հրամանատարական պաշտոններ, 17 տարի եղել է ավիավերանորոգման զորամասի հրամանատար: Իսկ Մուրադյանը Շիրակի մարզպետարանի ներքին աուդիտի բաժնի պետն է: Առաջին հորիզոնականը զբաղեցրած Պետրոսյանը Պարկի նախկին տնօրենն է, Իգիթյանը՝ Պարկի գիտության բաժնի պետը:
Նախկին տնօրենը 2014-2017թթ. է ղեկավարել, որի ընթացքում ՊՈԱԿ-ում խնդիրները չեն նվազել. նրա նկատմամբ նաև չարաշահումների վերաբերյալ դատական գործ կա: Մեծ տարածք, մեծ անձնակազմ ու անվտանգության հետ գործ ունեցող ոլորտ ղեկավարելու փորձառությամբ չի փայլում նաև Վարդան Հարությունյանը. Ամասիայի անասնաբույժն է:
Շրջակա միջավայրի նախարարության մամուլի քարտուղար Դավիթ Գրիգորյանը հայտնել է, որ նախարարության կողմից ցանկացած թափուր տեղի համար հայտարարված մրցույթն անց է կացվում օրենքի սահմաններում: Դեռևս 2009թ. ապրիլի 16-ին ՀՀ Կառավարության կողմից կայացված որոշման համաձայն, որով ստեղծվել է «Արփի լիճ» ազգային պարկ ՊՈԱԿ-ը և հաստատվել նրա կանոնադրությունը, ՊՈԱԿ-ի տնօրենին պաշտոնի նշանակում և պաշտոնից ազատում է լիազորված պետական մարմինը (տվյալ դեպքում՝ Շրջակա միջավայրի նախարարը):
Անցողիկ շեմը հաղթահարած թեկնածուներից մեկին, ըստ նպատակահարմարության, նախարարը տնօրեն է նշանակում: Բարձրացված հարցը պայմանավորված է նրանով, որ նախարար Էրիկ Գրիգորյանը նպատակահարմար է գտել 5-րդ հորիզոնականն զբաղեցրած թեկնածուին: Գերատեսչությունը դեռ պաշտոնական հայտարարություն չի արել, սակայն ավելի վաղ մամուլի քարտուղարը շեշտել էր տնօրեն նշանակելու հարցում օրենսդրական խնդրի բացակայության մասին:
Այդպիսի խնդիր, ըստ երևույթին, կա այնքանով, որ նախարարը պետք է հաշվի առներ ոչ թե իր կամ, գուցե, «հովանավորի» նպատակահարմարությունը, այլ մրցույթի արդյունքներով պայմանավորված՝ թեկնածուի՝ տվյալ կառույցը ղեկավարել կարողանալու հանգամանքը: Եթե համեմատելու լինենք, կարող ենք փաստել, որ նախկին տնօրենի դեպքում արդյունքը տեսել ենք, ուստի կարիք չկա վերադառնալ անհաջող կարիերան շարունակելուն:
Ներքին աուդիտի բաժինն, ինչպես գիտենք, շատ հեռու է սարերում, Ազգային պարկի տարածքում վերահսկողություն իրականացնելու և մեծ անձնակազմ ղեկավարելու ունակությունից: Ովքեր ծանոթ են տեղանքին, կհասկանան, որ այստեղ կան բազմաթիվ խնդիրներ որսագողության, պետական սահմաններին մոտ գտնվելու և դրանով պայմանավորված՝ բազմաթիվ վտանգների հետ: Ուստի, ենթադրվում է, նպատակահարմար պետք է լիներ մաքուր անցյալ ունեցող ու անընդմեջ արդյունքներ գրանցած թեկնածուի ընտրությունը:
Պատգամավոր Կարեն Սարուխանյանը, ում անվան հետ կապվում է Մուրադյանի նշանակումը, նշել է, որ Մուշեղ Մուրադյանը, ղեկավարելով մարզպետարանի ներքին աուդիտի բաժինը, Սարուխանյանի՝ մարզպետ լինելու ընթացքում մեծ արդյունավետությամբ է աշխատել՝ բացահայտելով բազմաթիվ չարաշահումներ ու գողացված գումարը պետական բյուջե վերադարձնելով։
Հռետորական հարց տանք՝ գուցե մարզպետարանը նրա կարիքն ունի՞, շարունակի՞ բացահայտումները, այդ թվում և՝ Ազգային պարկի նախկին ղեկավարների և ընդհանրապես՝ մարզի նախկին ու ներկա պաշտոնյաների գործունեությունում:
Կարեն Սարուխանյանը, հերքելով իր անվան շուրջ պտտվող տեղեկությունները, նշել է, որ ճանաչում է Մուշեղ Մուրադյանին, նրա հետ աշխատել է մարզպետարանում: Նախկին մարզպետի խոսքով՝ բոլոր բաժինների ու վարչությունների պետերին ու ամբողջ անձնակազմին է ճանաչում:
Պատգամավորը նույնպես ընդգծել է նախարարի իրավասությունը՝ տնօրեն նշանակելու հարցում: Նրա խոսքով՝ իր անվան հետ կապելը նպատակ ունի հարված հասցնել քաղաքական թիմին կամ իշխանությանը: Կարեն Սարուխանյանի համոզմամբ՝ որոշ ուժեր մտահոգություն ունեն, որ հանկարծ իրենց ոչ նախընտրելի թեկնածու կնշանակվի ու կբացահայտվեն բազմաթիվ չարաշահումներ:
Կրկին հարցնենք՝ այսինքն, ինքը նույնպե՞ս նպատակահարմար է գտնում Մուրադյանի՝ «չարաշահումներ բացահայտելու» միակ ունակ մարդու նշանակումը: Իսկ գուցե նա ներքին աուդիտի բաժնո՞ւմ շարունակեր բացահայտումները, իսկ տնօրենը զարգացներ, կարգի բերեր Պարկը: Այդուհանդերձ, պատգամավորի անվան շուրջ առաջացած խոսակցություններից հետո հայտնի դարձավ, որ իսկապես Մուրադյանն է տնօրեն նշանակվել: Եթե կեսը ճիշտ էր, կարող էր մյուս կեսն էլ ճիշտ լինել, այնպես չէ՞:
Ազգային ժողովի պատգամավորն իր անվան շուրջ ընթացող խոսակցությունները կապում է նախկինում իշխանության եղած կամ դրանց աջակից կուսակցությունների հետ: Սարուխանյանի խոսքով՝ հիմնական պատճառը վերջին շրջանում տեղի ունեցած բացահայտումներն ու ձերբակալություններն են՝ կապված Պարկի տարածքում չարաշահումների հետ:
Այստե՞ղ ինչ նկատի ունի: Որ Մուրադյանին դեմ ե՞ն: Իսկ ի՞նչ իմացավ, որ դեմ են: Ենթադրվում է, որ ամբողջ ընթացքին հետևում է՝ մրցույթից մինչև նշանակում: Հատկապես երբ նրա խոսքով՝ միայն Մուրադյանի թեկնածությանն են նախկինները դեմ: Սա ի՞նչ է, եթե ոչ՝ «հովանավորչություն»:
Այո, ներկայումս հանդիպում են դեպքեր, երբ արդարանալու համար նախկինների վրա են մեղքը գցում: Անշուշտ, նախկիններն անմեղ չեն: Բայց պետք է արձանագրենք, որ կարիք չկա նմանատիպ հարցադրումներում ինչ-որ հետք որոնելու: Հուսով ենք՝ այս հրապարակումից հետո մեզ չեն մեղադրի դրանում, ինչպես չպետք է «սև» համարել այն լրատվամիջոցներին, որոնք խոսքի ազատության սահմաններում անդրադառնում են ինչ-որ երևույթի կամ անձի: Մեր ընթերցողներն այդ լավ գիտեն՝ հաշվի առնելով նախորդ հրապարակումները:
Ավելի վաղ տեղեկություն էր տարածվել, որ «նախընտրելի» թեկնածուի հայրը «Արփի լիճ» ազգային պարկի տարածքում գտնվող Զորակերտ գյուղում ֆերմերային մեծ տնտեսություն ունի, իսկ Ղազանչի գյուղի մոտ 200-300 հեկտար վարձակալությամբ տրված տարածք:
Կարեն Սարուխանյանը հաստատել է այդ տեղեկությունը՝ նշելով, որ այդ խոսակցություններն ընթացել են դեռ իր՝ մարզպետ եղած ժամանակ: Նրա խոսքով՝ Ազգային պարկի տարածքում Մուրադյանը հողեր ստացել է Պարկի հիմնումից առաջ՝ մոտ 17-18 տարի առաջ: Ներկայումս դրանք տրված են ենթավարձակալության:
Հետաքրքիր է՝ նախարարը տնօրեն նշանակելիս հաշվի առե՞լ է «հողեր ունենալու» հանգամանքը: Կամ հաշվի առնվե՞լ են ընդհանրապես մյուս թեկնածուների տվյալները, մրցույթի արդյունքները:
Հարցերն առաջացել են, քանի որ նախարարության կայքում պաշտոնական հայտարարություններ չկան մրցույթի արդյունքների, հավակնորդների մասին մանրամասն տվյալների, տնօրենի նշանակման հիմնավոր նպատակահարմարության վերաբերյալ:
Միայն հիշեցնենք, որ դեռևս կազմավորման վերաբերյալ Կառավարության որոշմամբ նախարարին հանձնարարվում է «Արփի լիճ» ազգային պարկ» պետական ոչ առևտրային կազմակերպության տնօրենի պաշտոնի զբաղեցման համար մրցույթի անցկացումը և դրա արդյունքների հիման վրա տնօրենի նշանակումը»: Արդյունքների հիման վրա…
Իրանական աղբյուրը տեղեկացնում է, որ Թուրքիան ու Բաքուն մտադրություն են ունեցել հանկարծակի հարձակում ձեռնարկել Հայաստանի…
Քանի դեռ վերլուծական շրջանակներում փորձում են վեր հանել Իրանի և Ադրբեջանի միջև լարվածության իրական պատճառներն…
Ռուսական խաղաղապահ ստորաբաժանումն Արցախի «Հյուսիս» տեղանքում հրադադարի հնարավոր խախտումների կանխման և դիտակետերի անվտանգության ապահովման վարժանքներ…
Լճի ափամերձ եզրագիծը նահանջել է 1 կմ-ով, ջրի մակարդակն ընկել է 22-23 մ-ով: Ցամաքած հատվածներում…
Վարչապետ Փաշինյանի նախկին խորհրդական Լևոն Մազմանյանն ուշագրավ վերլուծություն է հրապարակել իր ֆեյսբուքյան էջում, որտեղ անդրադարձել…
Ի հեճուկս Ալիևի փորձերին՝ «Լեռնային Ղարաբաղ» անվանումը միջազգային փաստաթղթերից դուրս մղելու ուղղությամբ, Ստրասբուրգում ընդունվել է…