Թուրքիան հասավ իր նպատակին. «անվտանգության գոտին» ստեղծված է՝ կարելի է կրակը դադարեցնել

Թուրքիան 120 ժամով դադարեցնում է ռազմագործողությունը Սիրիայում` Քուրդիստանի բանվորական կուսակցության (ՔԲԿ) զինված ուժերի ելքը սահմանամերձ շրջաններից ապահովելու նպատակով: Այս մասին Անկարայում հայտարարել է ԱՄՆ փոխնախագահ Մայքլ Փենսը՝ Թուրքիայի նախագահ Ռեջեփ Թայիփ էրդողանի հետ Սիրիայի հարցով բանակցություններից հետո:

Մայքլ Փենսը նշել է, որ հոկտեմբերի 17-ին համաձայնություն է ձեռք բերվել ԱՄՆ նախագահ Դոնալդ Թրամփի և թուրք-ամերիկյան ամուր հարաբերությունների շնորհիվ: Նրա խոսքով՝ Թուրքիան 120 ժամով կդադարեցնի «Խաղաղության ակունք» ռազմագործողությունը՝ ՔԲԿ-ին հնարավորություն տալով լքել անվտանգության գոտին:

Այսպիսով, Վաշինգտոնն ու Անկարան համաձայնության են եկել՝ Սիրիայի հյուսիսում անվտանգության գոտի ստեղծելու հարցում: Փենսը նշել է, որ մանրամասների մասին կողմերը ավելի ուշ կպայմանավորվեն՝ փոխադարձ պարտավորությունների միջոցով հասնելով խաղաղ կարգավորումների:

ԱՄՆ-ը կնպաստի քուրդ զինյալների ելքը Սիրիայի՝ թուրքական գործողությունների շրջաններից: Բացի այդ՝ ԱՄՆ-ը նոր պատժամիջոցներ չեն սահմանի Թուրքիայի նկատմամբ: Փենսը նշել է, որ Վաշինգտոնն Անկարայի նկատմամբ բոլոր պատժամիջոցները կչեղարկի կրակի վերջնական դադարեցումից հետո:

Հիշեցնենք՝ հոկտեմբերի 9-ին թուրքական բանակի օդուժը, հրետանին ու ցամաքային զորքերը հարձակում էին սկսել Սիրիայի հյուսիս-արևելյան շրջանների վրա՝ նպատակ ունենալով սահմանի երկայնքով ստեղծել «անվտանգության գոտի» և ոչնչացնել քրդական՝ թուրքական որակմամբ՝ ահաբեկչական, խմբավորումներին: