Ադրբեջանական կողմից քաղաքացիական անձինք խախտել են շփման գիծը, անցել միջդիրքային տարածք

ՀՀ պաշտպանության նախարարությունը հայտարարել է, որ ապրիլի 28-ին, ժամը 11.40-ի սահմաններում, ՀՀ պետական սահմանի հյուսիսարևելյան հատվածում, N զորամասի պահպանության տեղամասում, քաղաքացիական հագուստով 8-10 անձ, ադրբեջանական Ալիբեյլի բնակավայրի (խոսքը, հավանաբար, Արցախի Քաշաթաղի շրջանի Երիցվանք գյուղի մասին է, խմբ.) կողմից խախտելով շփման գիծը, անցել են միջդիրքային տարածք:

Ինչպես նշվում է` նրանք իրենց հետ բերել են 30-40 մ երկարությամբ խողովակներ. ՊՆ ենթադրությամբ` խողովակները նախատեսված են եղել այդ տարածքից ադրբեջանական մոտակա հենակետ ջուր հասցնելու նպատակով:

Հաղորդվում է, որ ՀՀ զինված ուժերի առաջապահ դիրքերի զինծառայողներին նկատելով` քաղաքացիական հագուստով անձինք շտապ հեռացել են դեպի նշված բնակավայր: Խողովակները թողել են միջդիրքային տարածքում: ՀՀ ԶՈՒ զինծառայողները, ինչպես նշվում է, ցուցաբերել են զսպվածություն, չեն ենթարկվել սադրանքների: ՊՆ հաղորդագրության համաձայն` հակառակորդի աշխատանքները դադարեցվել են:

ՀՀ Ազգային անվտանգության ծառայության տվյալներով` ԱԱԾ սահմանապահ զորքերի պատասխանատվության տակ գտնվող Գորիս-Կապան միջպետական ավտոճանապարհի Որոտան-Դավիթ Բեկ հատվածում սահմանային միջադեպեր չեն գրանցվել:

ՊՆ հաղորդմամբ` Զինված ուժերի և Ազգային անվտանգության ծառայության սահմանապահ զորքերի ստորաբաժանումները սահ­մա­նա­գո­տու ամբողջ երկայնքով վերահսկում են սահ­մա­նային իրավիճակը և կատարում առաջադրված խնդիրները: