Ինչո՞ւ են ռուսական ինքնաթիռները մարում Թուրքիայի հրդեհները, երբ կրակի մեջ է նաև Սիբիրը

Վերջին շաբաթների ամենաշատ քննարկվող թեմաներից մեկը Թուրքիայում բռնկված անտառային հրդեհներն են, որոնք տարածվել են նաև քաղաքներում և զբոսաշրջային վայրերում: Եվ քանի դեռ Մոսկվան Անկարային աջակցություն է ցուցաբերում հրդեհների մարման հարցում, այրվում են նաև ռուսական Յակուտայի անտառները: Փորձագիտական շրջանակներում հարցադրում է հնչում, թե ինչո՞ւ են Բե-200 ինքնաթիռները ներգրավված ոչ թե ռուսական, այլ թուրքական հրդեհների մարման աշխատանքներին:

Հայտնի է, որ Թուրքիայում բռնկված հրդեհից տուժել են ավելի քան քսան քաղաքներ, տեղի բնակչության շրջանում կան զոհեր, իսկ գործարար միջավայրին և տնտեսությանը հասցված վնասը դեռ հաշվված չէ: Այդ պատճառով, ինչպես նշվում է, Անկարան հրդեհների մեղավորներին է փնտրում:

Սկզբնապես հայտարարվել էր 40°C անոմալ տապի և խոնավության ցածր մակարդակի մասին, սակայն այժմ, ինչպես հաղորդվել է, հրդեհների համար պատասխանատվություն է ստանձնել ահաբեկչական հռչակված «Քրդական աշխատավորական կուսակցության» հետ կապված «Կրակի զավակներ» կազմակերպությունը:

Այս իրավիճակում Ռուսաստանն օգնության է շտապել Թուրքիային` այդ երկրում բռնկված հրդեհները մարելու նպատակով տրամադրելով «երկկենցաղ» Բե-200, 40 տոննա ջրի տարողությամբ Իլ-76 ինքնաթիռներ, հրդեհաշիջման Մի-8 ուղղաթիռներ: Սակայն այդ նույն ժամանակ անտառային խոշոր հրդեհներ են նաև Ռուսաստանի տարածքում, և համարվում է, որ այդ տեխնիկան կարող էր կիրառվել Յակուտիայում:

Տեղումների բացակայության պատճառով տայգաները չորացել են: Կրակով են պատվել մեկ միլիոնից ավելի հեկտար անտառներ: Հրդեհի ծուխը տարածվել է Յակուտսկում ու հասել մինչև Բայկալի ափերը: Հաղորդվում է, որ խախտվել են գետերով իրականացվող փոխադրումները, պարբերաբար դադարեցվում է ավիահաղորդակցությունը:

Հրդեհաշիջման աշխատանքներին մասնակցում է շուրջ 2 հազար մարդ: Նշվում է, որ տեխնիկայի համար անհասանելի վայրերում հիմնական աշխատանքը ձեռքով է արվում: Այս պարագայում ռուսական տիրույթում բացասական արձագանքներ են առաջացել անհրաժեշտ տեխնիկան Թուրքիային տրամադրելու վերաբերյալ:

Պետդումայի Էկոլոհիայի և շրջակա միջավայրի պաշտպանության հանձնաժողովի ղեկավար Վլադիմիր Բուրմատովի խոսքով` Թուրքիա ուղարկված հատուկ տեխնիկան նախատեսված է այնտեղ գտնվող ՌԴ քաղաքացիներին պաշտպանելու համար:

Համարվում է, սակայն, որ պատգամավորը չափազանցացնում է. հանգստյան գոտիները, որոնք նախընտրելի են ռուս զբոսաշրջիկների համար, ափամերձ գոտում են, իսկ այնտեղ վտանգն ամենաքիչն է: Շեշտվում է, որ հակառակ դեպքում անհրաժեշտ կլիներ ոչ թե հրդեհաշիջման տեխնիկա ուղարկել, այլ` Ռուսաստանի քաղաքացիներին տարհանման:

Մեկ այլ մեկնաբանության համաձայն` Յակուտիայում Բե-200 «երկկենցաղները» չեն կարող վայրէջք կատարել ու ջրով լիցքավորվել, ինչը հնարավոր է Թուրքիայում: Սակայն սա նույնպես անհասկանալի է համարվում` հաշվի առնելով սիբիրյան խոշոր գետերը:

Ուշադրություն է հրավիրվում այն բանի վրա, որ հակահրդեհային Իլ-76 ինքնաթիռը և Մի-8 ուղղաթիռը, ի տարբերություն «երկկենցաղ» Բե-200-ի, լիցքավորվում են ցամաքի վրա, որոնց համար լճեր ու ծովեր պետք չեն:

Այսպիսով, համարվում է, որ Թուրքիա տեխնիկա ուղարկելու համար խելամիտ բացատրությունը միայն «քաղաքական գեղեցիկ քայլ» կատարելու ցանկությունն է: Մինչդեռ նշվում է, որ համապատասխան հագեցվածության պարագայում հնարավոր կլիներ նախ մարել սիբիրյան հրդեհները, իսկ թուրք գործընկերներին ուղարկել ազատ ինքնաթիռները: