ՕՍԱ-ներն արագորեն հայտնաբերվել ու ոչնչացվել են, որովհետև պատերազմի ժամանակ տեղաշարժվել են մայրուղիներով

Պատերազմի օրերին Արցախում նկարահանումներ իրականացրած աղբյուրը լուսանկարներ է հրապարակել, որտեղ երևում են հայկական կողմի ՕՍԱ-յի մնացորդները: Նշվում է, որ այս ՀՕՊ համակարգերը, որոնք գտնվում են ճամփեզրերին, արագորեն հայտնաբերվել ու ոչնչացվել են, որովհետև պատերազմի ժամանակ տեղաշարժվել են մայրուղիներով, ասֆալտապատ ճանապարհներով` առանց քողարկման, և աշխատել են հարակից անտառային տարածքներում:

Տվյալ լուսանկարում պատկերված տեխնիկան, ինչպես հայտնի է, ոչնչացվել է Բայրաքթար կամ Հարոպ տեսակի անօդաչուի հարվածից: Անձնակազմը, եթե ներսում է եղել, փրկվելու հնարավորություն չի ունեցել: Սակայն տարածքում այրված սաղավարտներ ու պահեստատուփեր են հայտնաբերվել:

Աղբյուրը շեշտում է, որ Արցախյան հակամարտության հիմնական դասերից է` «առանց արդյունավետ Հակաօդային պաշտպանության համակարգերի ինքնիշխանություն այլևս հնարավոր չէ»: Պաշտպանության այս ուղղությունն այլևս անհրաժեշտ պայման է համարվում պետության համար, ինչպես տարածքն ու հարկերն են:

Նշվում է, որ աշխարհում ներկայումս մի քանի երկրներ են տիրապետում հակաօդային պաշտպանության համալիր լուծումների: Առանձնահատուկ ընդգծվում է, որ Ռուսաստանն այն պետություններից է, որն այդ «էլիտար խմբի» անդամ է: