Voices of Strangers — Telegram-բոտ՝ անանուն շփումներ ձայնային հաղորդագրություններով

Նոյեմբերի վերջին սոցցանցերում ուշադրության արժանացավ Voices of Strangers անվամբ Telegram-բոտը: Նրանում կարելի է ստանալ և լսել պատահական անծանոթների ձայնային հաղորդագրությունները, որոնք ձայնագրվել են բոտի համար: Բոտի հեղինակ Եվգենի Կուդաշյովն այն անվանում է սոցիալական փորձարկում, իսկ հարյուրավոր օգտատերեր այն վերածել են համատեղ չաթի, դեյթինգ-ծառայության և անձնական թեմաներով արտահայտվելու միջոցի:

Բոլոր հաղորդագրությունները բացառապես անանուն են. ստացողները չեն տեսնում «ձայնն» ուղարկողի անունն ու օգտահաշիվը: Ձայնագրությունների հեղինակներն իրենց հերթին չեն տեղեկանում հասցեատիրոջ մասին: Այսպես օգտատերերն առավել անկեղծանում են՝ հրապարակելով այնպիսի թեմաներ, որոնք իրենց անունից չէին անի:

Անանուն «ձայներ» ստանալու նպատակով սկզբում պետք էր հաղորդագրություն ուղարկել բոտին՝ թեկուզ և՝ 5-10 վայրկյան: Միայն դրանից հետո հնարավոր էր ստանալ այլոց ձայնային հաղորդագրությունները: Սակայն, ինչպես նշել է Կուդաշյովը, այդ նախնական հաղորդագրություններն անիմաստ էին, ուստի այժմ միանգամից կարելի է play հրամանով ստանալ մյուսների հաղորդագրությունները:

Մեկ նրբություն ևս. բոտը ձայնային հաղորդագրությունն ընտրում է վերջին 200 «ձայներից»՝ երբեմն ստեղծելով իրական ժամանակով չաթեր: Օրինակ, արձանագրվել են դեպքեր, երբ լսվել է երկու անծանոթների զրույցը, որոնց մի աղջիկ մեկնաբանել է: Ինչպես հաղորդվում է, այնտեղ միայն հայհոյանք է եղել:

Այլ դեպքեր ևս. լսվել են երգեր, հեռախոսահամարի ինստագրամյան հաշիվների թելադրություն, իսկ մի աղջիկ էլ պատմել է, որ Tinder-ը ջնջել է, որովհետև հոգնել է հանդիպումների գնալուց:

Ի՞նչ են ասում հեղինակները և օգտատերերը

Մի քանի օրում բոտը տարածվել է Telegram-ի օգտատերերի շրջանում: Կուդաշյովը նշել է, որ միևնույն ժամանակ հարթակում գտնվում է մի քանի տասնյակ մարդ: Իսկ play կոճակը մի քանի րոպեում սեղմվում է մինչև 400 հազար անգամ: Ծառայության մասին խոսել են նաև այլ սոցցանցերի օգտատերերը:

Facebook-ում Voices of Strangers-ի բնույթը փորձում են հասկանալ ավելի խորը՝ նշելով, որ բոտի միջոցով արդեն նոր ընկերներ են ձեռք բերել: Օգտատերերի խոսքով՝ ծառայությունն օգնում է պայքարել միայնակության դեմ և ինչ-որ տեղ նաև վերանայել վերաբերմունքը ձայնային հաղորդագրությունների նկատմամբ, որոնք հաճախ են քննադատվում:

Նիկ Մակֆլայի խոսքով՝ Telegram-բոտով Voices of Strangers-ից ստացված 7 վայրկյանանոց ձայնային հաղորդագրությունը հետևյալ տեսքն ունի՝ «ևս մեկ հաղորդագրություն, թե ՝ քնել, ևս մեկ հաղորդագրություն, թե՝ քնել…»: Նրա խոսքով՝ բազմաթիվ այլ օգտատերեր հաղորդագրություններում նշել են, որ արդեն մի քանի ժամ հավելվածում են և չեն կարողանում դուրս գալ այնտեղից:

Մակֆլայի խոսքով՝ կարելի է երկար քննարկել, որ ուշադրությունն էներգիա է, իսկ Էրիկ Բյորնի կարծիքով՝ մարդիկ շոյանքի կարիք ունեն ու նրանց չի բավարարում շփումը, բայց, ինչպես Մակֆլայն է նշում, խնդիրը միայն այդ չէ. մարդիկ հենց այդպիսի շփման կարիք ունեն: Հակավիզուալային և հակատեքստային համացանցը, որտեղ լսվում է ձայնի հնչերանգը, որտեղ աուդիոն գրավում է լսողի ուշադրությունը:

Մակֆլայն ամենակարևորը նշել է մթնոլորտը, որտեղ մարդիկ աջակցում են միմյանց, բարեմաղթում: Նրա խոսքով՝ սա ոչ միայն շփում է համացանցում, այլ գրեթե թերապևտիկ հաղորդակցություն, հոգեգործակցություն: Կուդաշյովն ինքը կարծում է, որ հաջողությունը պայմանավորված է առաջին հերթին անանունությամբ: Մարդիկ պատրաստ են զրուցել անծանոթների հետ, ասել այն, ինչ չէին ասի ընկերներին: Ուղարկված ձայնային հաղորդագրությունների մեծ մասն ինտիմ բնույթ ունեն, գերգաղտնի են:

Կուդաշյովի խոսքով՝ այնտեղ կա անակնկալ, անսպասելիություն, հետաքրքրություն: Շատ դյուրին խաղի կանոններ են, լայն հնարավորություններ՝ կարելի է երգել, կշտամբել, բարեմաղթանքներ հղել, գովազդել: Հեղինակի պնդմամբ՝ սա մարդկանց համար նոր միջավայրում հայտնվելու, անսպասելի էմոցիաներ փորձարկելու, անծանոթի հետ մերձավոր կապ զգալու հնարավորություն է: