Մալայզիացու այֆոնը տանից գողացել են. գտել է ջունգլիներում: Նրանում հայտնաբերել է կապիկի արած ինքնանկարներն ու տեսանյութերը

20-ամյա ուսանողի-ծրագրավորող Զաքրիձ Ռոձին իր թվիթերյան էջում iPhone-ի անհետացման հետ կապված ուշագրավ դեպք է պատմել. հեռախոսը տանից կորել է, և տղան այն հայտնաբերել է հաջորդ օրը՝ ջունգլիներում: Գողին պարզելու համար երկար ժամանակ չի պահանջվել. կապիկը մի շարք ինքնանկարներ է արել, տեսանյութ նկարել:

Ռոձին պատմել է, որ սեպտեմբերի 12-ին արթնացել է Բատու Պախատ քաղաքի տանը, սակայն սմարթֆոնն իր տեղում չի եղել: Նա խուզարկել է ամբողջ տունը և գտել պատյանը, ինչը նրա համար տարօրինակ է եղել. գողը դժվար թե նման կերպ վարվեր: Զաքրիձեն ոչ մի կոտրանք չի հայտնաբերել:

Ուսանողը փորձել է հեռախոսի գտնվելու վայրը պարզել տեղորոշման միջոցով, սակայն չի հաջողվել: Հաջորդ օրը Ռոձին հոր հետ մեկնել է ջունգլի՝ տանից ոչ հեռու, և հեռախոսի զանգի ձայնն է լսել: Պալմայի տերևների տակ էլ գտել է իր այֆոնը:

Դիտելով լուսանկարները՝ Զաքրիձը նկատել է մի շարք ինքնանկարներ ու տեսանյութեր, որտեղ «գլխավոր դերում» կապիկն է, ով, ենթադրաբար, գողացել է հեռախոսը: Երիտասարդի կարծիքով՝ կապիկը տուն է մտել բաց պատուհանից, աննկատ վերցրել հեռախոսը, ապա միացրել տեսախցիկն ու փորձել է հեռախոսն ուտել:

Ինքնանկարներից բացի` լուսանկարել է նաև ջունգլիները: Զաքրիձը կատակել է, թե կապիկն այս պարագայում գիտակից լուսանկարիչ է եղել՝ նշելով. «Նա ավելի լավ է նկարում, քան ես»:

2011թ. բրիտանացի լուսանկարիչ Դևիդ Սլեյթերն Ինդոնեզիայի ջունգլիներում վայրի բնության լուսանկարներ է արել: Աշխատանքի ընթացքում նա տեսախցիկը տեղադրել է եռոտանու վրա ու հեռացել: Այդ պահին մակական մոտեցել է, սեղմել կոճակին ու մի քանի ինքնանկար արել:

Սա դեպքը դատական գործընթացների է հանգեցրել PETA կազմակերպության հետ՝ լուսանկարների հեղինակային իրավունքի համար: Կենդանիների պաշտպանները պնդել են կապիկներին հեղինակային իրավունք շնորհել: Լուսանկարիչը նշել է, որ գործընթացի կազմակերպիչն է, ուստի հեղինակային իրավունքն իրենն է: Կողմերը արդյունքում համաձայնության են եկել: