Աստղագետները հայտարարել են արեգակնային ակտիվության նոր շրջափուլի մեկնարկի մասին

Արեգակնային ակտիվության հաջորդ շրջափուլի մասին հայտարարել են NASA-յի տիեզերական եղանակի և ամերիկյան օդերևութաբանական NOAA գործակալության փորձագետները: Այն մեկնարկել է 2019թ. դեկտեմբերին, սակայն արեգակնային շրջափուլի կանխատեսման մասնագետների խումբը հիմա է կարողացել հայտարարել: Խնդիրն այն է, որ Արեգակը փոփոխական է, ուստի նոր շրջափուլի հաշվարկումը և կանխատեսումն ամիսներն են պահանջում:

Լուսատուի ակտիվությանը հետևելու հարցում գիտնականներին աջակցում են նրա մակերեսի մուգ բծերը: Նրանց ծագումն ուղեկցվում է արեգակնային ակտիվության տարբեր երևույթներով. զանգվածի կեղևային արտանետումներով ու բռնկումներով: Նրանք, իրենց հերթին, փոխում են տիեզերական եղանակը և, որպես հետևանք, ազդում են Երկրի մագնիսական դաշտի, արբանյակների աշխատանքի և տիեզերական ծրագրերի կազմման վրա:

Մինչև 2019թ. դեկտեմբերը Արևը խաղաղ է եղել. նրա մակերեսին գիտնականները գործնականում բծեր չեն նկատել, իսկ կարճալիքային ճառագայթման մակարդակն ընկել է սարքավորումների զգայունության տիրույթից ներքև: Սակայն այդ ժամանակից սկսած մեր աստղի ակտիվությունն աստիճանաբար աճում է: Ներկայումս հետազոտական խումբը հետևում է արեգակնային մի քանի ոչ մեծ բծերին, որոնք ազդարարում են նոր շրջափուլի սկիզբը:

Կանխատեսման համաձայն՝ համար 25 շրջափուլը շատ նման է լինելու նախորդին, որը վերջին 100 տարվա ընթացքում ամենաթույլն է եղել. վերջին շրջափուլի արեգակնային ակտիվության գագաթնակետի ժամանակ աստղագետներն արեգակնային 120 բծեր են հայտնաբերել, իսկ նոր շրջափուլի գագաթնակետին՝ 2025թ., նկատելի կլինեն շուրջ 115-ը: Համեմատության համար՝ միջինից բարձր ակտիվությամբ շրջափուլերի ժամանակ գիտնականները կարող են նշմարել ավելի քան 200 բծեր: Հետազոտական խմբի համանախագահ և NOAA-յի ֆիզիկոս Դագ Բիսեքերի խոսքով՝ այն, որ նոր շրջափուլը համեմատաբար թույլ է լինելու, չի նշանակում, թե չկա տիեզերական աննախադեպ եղանակի վտանգ:

NASA-յի փորձագետներն ընդգծում են, որ արեգակնային ակտիվության վերլուծությունը հույժ կարևոր է լուսնային ապագա առաքելությունների ծրագրման համար: Հետազոտությունը պետք է օգնի հասկանալ, թե ինչպես է ճառագայթումն ազդելու տիեզերագնացների և տեխնիկայի վրա և ինչպես կարելի է նվազեցնել դրա ազդեցությունը: Գիտնականներն աշխատում են կանխատեսման մոդելների վրա, որպեսզի սովորեն կանխատեսել տիեզերական եղանակն այնպես, ինչպես օդերևութաբանները կանխատեսում են եղանակը Երկրի վրա:

NOAA գործակալությունը տիեզերական եղանակը դիտարկում են արբանյակների միջոցով և կանխատեսումներով կիսվում են Կոլորադոյի հետազոտական կենտրոնի միջոցով, իսկ NASA-ն հետազոտում է մերձերկրյա տիեզերական տիրույթը, որպեսզի բարելավվեն տիեզերական եղանակի կանխատեսումը:

Էջանիշ

Պատճենել հղումը

Email

Տպել

Twitter

VK

Telegram