Հայաստանում ԱԹՍ-ների արտադրության և արտահանման ծրագիր կիրականացվի

Կառավարության հունիսի 24-ի որոշմամբ` «Արտեկ փովեր սիստեմա» ՍՊԸ-ն ներառվել է «Ալյանս» ազատ տնտեսական գոտու շահագործողների ռեեստրում: Ընկերությունն ազատ տնտեսական գոտում նախատեսում է 2021-2025թթ. իրականացնել 4,250,000 հազար դրամի ներդրում` ծավալելով բարձր և նորարարական տեխնոլոգիաների, մասնավորապես՝ անօդաչու թռչող սարքերի արտադրության գործունեություն:

Ծրագրի ընթացքում, ինչպես նշվում է, ստեղծվելու է ավելի քան 85 նոր աշխատատեղ` առաջին տարում շուրջ 450-550 հազար դրամ միջին ամսական աշխատավարձով: Ընկերությունն ազատ տնտեսական գոտում գործունեության առաջին տարում ունենալու է մոտ 250 քմ գրասենյակային տարածք, որն ընդլայնվելու է՝ հինգերորդ տարում հասնելով 1000 քմ մակերեսի:

Հավելենք, որ «Ինտերակտիվ սմարթ տեխնոլոջի ֆեզ» ՍՊԸ նույնպես ներառվել է «Ալյանս» ազատ տնտեսական գոտու շահագործողների ռեեստրում: Այս ընկերությունը նույնպես գործունեություն է իրականացնելու բարձր և նորարարական տեխնոլոգիաների (մասնավորապես՝ էլեկտրոնային սարքերի) արտադրության և արտահանման ոլորտում:

2021-2025թթ. ծրագրի շրջանակներում իրականացվելու են շուրջ 67,704,000 հազար դրամի ներդրումներ, ստեղծվելու է 60 նոր աշխատատեղ` առաջին տարում շուրջ 350-400 հազար դրամից (առաջին տարում) մինչև 400 հազար դրամ միջին ամսական աշխատավարձով: Նշվում է, որ ընկերությունն ունենալու է մոտ 650 քմ արտադրական տարածք: