Արայիկ Հարությունյանը, Արմեն Աբազյանը և Ռուստամ Մուրադովն ադրբեջանցի պաշտոնյայի հետ են հանդիպել

Արցախի նախագահը, Հայաստանի Հանրապետության Ազգային անվտանգության ծառայության տնօրենը և Արցախում Ռուսաստանի Դաշնության խաղաղապահ զորակազմի հրամանատարը ռուսական զորակազմի վերահսկողության տակ գտնվող տարածքում հանդիպել են ադրբեջանական կողմի պաշտոնական ներկայացուցչի հետ:

Արցախի նախագահի մամուլի խոսնակի հաղորդմամբ` Արայիկ Հարությունյանի, գնդապետ Արմեն Աբազյանի, գեներալ-լեյտենանտ Ռուստամ Մուրադովի և ադրբեջանցի պաշտոնյայի հանդիպման ընթացքում քննարկվել են գերիների վերադարձին, անհայտ կորածների որոնմանը վերաբերող և հումանիտար այլ հարցեր:

Լուսինե Ավանեսյանը նշել է, որ հանդիպման ժամանակ քննարկվել են նաև 1990-ականների պատերազմի ընթացքում անհայտ կորած անձանց ճակատագրերին վերաբերող հարցեր:

Հիշեցնենք, որ ադրբեջանական կողմի` ավելի վաղ արված հայտարարությունների համաձայն` Արցախյան առաջին պատերազմից հետո Ադրբեջանն ունեցել է ավելի քան 3 հազար անհետ կորած:

Հայկական կողմն, ըստ տարբեր տվյալների, 90-ականների պատերազմի հետևանքով ներկայումս անհայտ կորած է համարվում Արցախից` 300-400 մարդ, ՀՀ-ից` 600-800: Ապրիլյան պատերազմում անհայտ կորած հայեր չեն եղել: