Կրկին մահ. ո՞վ է Բարոյահոգեբանական վարչության նորանշանակ պետը և ինչո՞ւ ոչինչ չի արվում՝ սպանությունները կանխելու համար

Պաշտպանության բանակի մամուլի ծառայության հաղորդմամբ՝ ապրիլի 3-ին, ժամը 00:35-ի սահմանում, ՊԲ հարավ-արևելյան ուղղությամբ տեղակայված զորամասերից մեկի պահպանության տեղամասում, դեռևս չպարզված հանգամանքներում, մահացու հրազենային վիրավորում է ստացել ՊԲ զինծառայող, 2000թ. ծնված Գարեգին Կամոյի Բաբակեխյանը (Աբովյան քաղաքի բնակիչ):

Ընդգծենք, որ «չպարզված հանգամանքներում» նշվում է հիմնականում այն դեպքերում, որոնք հակառակորդի կրակոցի հետևանք չեն: Ուստի հանրությունն ակնկալում է, որ դեպքի մանրամասներն ամբողջությամբ պետք է պարզվեն և մեղավորները պատժվեն:

Սակայն պետք է հիշենք նախորդ ցավալի դեպքերը, որ տեղի են ունեցել բանակում վերջին ամիսներին. զոհված զինծառայողների ծնողները բողոքում էին դեպքի կոծկման, իրականությունը թաքցնելու մեջ: Եղավ նաև դեպք, երբ ծնողներն իրենց զավակին դին պատրաստվում էին կառավարություն տանել. նրանց հետ Պաշտպանության նախարար Դավիթ Տոնոյանի զրույցից հետո որոշակիորեն հանդարտվեցին՝ սպասելով իրական մեղավորների պատժին:

Հիշեցնենք նաև, այդ բազմաթիվ ոչ մարտական կորուստներից հետո բանակում՝ ինչպես ՀՀ, այնպես էլ Արցախի զինված ուժերում, տեղի ունեցան մի շարք պաշտոնանկություններ: Նոր նշանակումներ եղան: Թեև որոշակիորեն նվազեցին ցավալի դեպքերը, սակայն, ինչպես երևում է, դրանք չեն մարել, և դրանում որոշ պաշտոնյաների փոփոխությունը դերակատարում, կարծես, չունեցավ:

ՀՀ Քննչական կոմիտեի հաղորդմամբ՝ կզակի շրջանում մահացու հրազենային վնասվածք ստանալու դեպքի առթիվ քրեական գործ է հարուցվել ՀՀ ՔՕ 360.1 հոդվածի 2-րդ մասի 3-րդ կետով (զինծառայողին անզգուշությամբ ինքնասպանության հասցնելը՝ մարտական հերթապահություն կամ մարտական ծառայություն կրելու ընթացքում): Կատարվում է նախաքննություն:

Ո՞վ է Արթուր Պողոսյանը

Ս.թ. փետրվարի 19-ին գեներալ-մայոր Ալեքսան Ալեքսանյանն ազատվել էր ՀՀ Զինված ուժերի բարոյահոգեբանական ապահովման վարչության պետի պաշտոնից (նրա փոխարեն նշանակվել է Արթուր Պողոսյանը, ով մինչ այդ ՀՕՊ զորքերի հրամանատարի տեղակալ էր), Արթուր Բաղդասարյանը՝ ՀՀ ՊՆ ռազմական ոստիկանության պետի պաշտոնից (ԺՊ է նշանակվել Ալեքսանդր Աղաջանյանը): Ազատվել են նաև մի քանի բաժնի պետեր: Նույն օրերին Կարեն Աբրահամյանն է ազատվել Արցախի ՊՆ-ՊԲ հրամանատարի պաշտոնից (նշանակվել է Ջալալ Հարությունյանը:)

Արթուր Պողոսյանի նշանակումից հետո մամուլում տեղեկություններ էին տարածվել՝ հիշեցնելով նրա վերաբերյալ տարիներ առաջ եղած աղմկահարույց հրապարակումները:

Հաղորդվել է, որ «Նորաշեն 2007» ընկերության գործունեությունից տուժած մի խումբ բնակիչներ բաց նամակ էին հրապարակել, որտեղ նշել էին, թե 2011թ. փետրվարի 16-ին հարուցված քրգործի նախաքննության շրջանակներում ՀՔԾ պետ Անդրանիկ Միրզոյանը շատ կարևոր ապացույց ձեռք բերելու նպատակով պաշտոնական հարցում է կատարել ՀՀ ՊՆ: Սակայն ՊՆ-ից նրան կեղծ տեղեկություն են տրամադրել: Նշվել է, որ դրա կազմակերպիչը ՊՆ ՀՕՊ վարչության պետի տեղակալ, գնդապետ Արթուր Արիսի Պողոսյանն է, որը սույն գործով մեղադրյալի փոխարեն ճանաչվել է վկա:

Հրապարակման համաձայն՝ հայտնել են, որ նախաքննության ժամանակ գնդապետը հրաժարվել է, որ իրենք ծանոթ են, այնինչ 2008-2010թթ. ընթացքում նրանց միջև կնքվել են բազմաթիվ գործարքներ. նոտարական պայմանագրերն առկա են:

Բացի այդ՝ բազմաթիվ օգտատերեր կասկած են հայտնել, որ հակաօդային պաշտպանության ոլորտում տարիներ շարունակ պաշտոն զբաղեցրած զինվորականը կկարողանա պատշաճ կերպով ղեկավարել բարոյահոգեբանական վարչությունը: Դա արդարացվում է նրանով, որ զինվորների տասնյակ մահերից հետո պետք էր առավել մեծ ուշադրություն դարձնել հենց այս վարչությանը՝ նշանակելով ոլորտի լավագույն մասնագետին:

Չխախտելով անմեղության կանխավարկածը՝ նշենք, որ հայկական բանակում առկա խնդիրներից կարևորը, թերևս, ղեկավարի ճիշտ ընտրությունն է: Իսկ բարոյահոգեբանական ուղղությունը յուրաքանչյուր սպանության/ինքնասպանության թիվ մեկ պատասխանատուն պետք է լինի՝ դեպքերը հասցնելով զրոյի: