Գիտնականները 3D տպիչով մարդու լյարդի նմուշ են ստեղծել` ռեկորդային չափերով
Ամերիկացի գիտնականների ստեղծած լյարդի նմուշները 30 օր «ապրել» և բնականոն գործել են լաբորատոր պայմաններում: Այժմ դրանք տեղափոխվելու են տիեզերք` տիեզերական պայմանների ու ռադիացիայի նկատմամբ դիմացկունությունը ստուգելու:
Wake Forest համալսարանի ռեգեներատիվ բժշկության ինստիտուտի գիտնականների երկու խմբերը հաղթել են NASA Vascular Tissue Challenge մրցույթում` 3D տպիչով կարողանալով ստանալ մարդու լյարդի հյուսվածքների նմուշներ: Առաջին և երկրորդ հորիզոնականներն զբաղեցնելու համար գիտնականները NASA-ի կողմից պարգևատրվել են համապատասխանաբար 300 հազար և 100 հազար դոլարով:
Ինչպես հաղորդվում է, 3D տպիչի միջոցով մարդկային հյուսվածքների ստեղծման հիմնական բարդությունը արյունատար և այլ անոթների բարդ ցանցի վերստեղծման մեջ է: Այդ անոթները բջիջներն ապահովում են թթվածնով և սննդարար նյութերով, ինչպես նաև մետաբոլիզմի արտադրանքն են հեռացնում հյուսվածքից: Այդ խնդրի լուծման նպատակով գիտնականներն օգտագործել են բարդ ցանցով գելային կմախք, որի վրա էլ «տեղադրել են» լյարդի բջիջները:
Լյարդի տպագրված նմուշները ռեկորդային չափեր ունեն` յուրաքանչյուրը` մեկ սանտիմետր: Մինչ այդ գիտնականները ստեղծել էին միայն մի քանի միլիմետրանոց դետալներ: Նմուշները կարողացել են 30 օր «ապրել» և բնականոն գործել լաբորատոր պայմաններում: Ներկայումս NASA-ն պատրաստվում է դրանք ուղարկել Միջազգային տիեզերակայան, որպեսզի ստուգեն ռադիացիայի և տիեզերական այլ պայմանների նկատմամբ դիմացկունությունը:
NASA Vascular Tissue Challenge մրցույթն ուղղված է մարդու հյուսվածքների ինժեներիայի ոլորտում նորարարության խթանմանը: Համարվում է, որ այդ հյուսվածքներն օգտագործվելու են ապագա տիեզերական թռիչքների համար:
Մեկնաբանությունները