Մահացել է Cut, Copy, Paste հրամանների հեղինակ Լարրի Տեսլերը
Կարիերան սկսել էր Xerox-ից, աշխատել Apple-ում, Amazon-ում և նշանավոր այլ ընկերություններում: Macintoshi-ի, Lisa-յի, Newton-ի ստեղծմանը մասնակցած Տեսլերը 74 տարեկան էր:
Ամերիկացի ծրագրավորող Լարրի Տեսլերը մահացել է փետրվարի 17-ին՝ 74 տարեկան հասակում: Նա հայտնի էր առաջին հերթին որպես «Կտրել» (Cut), «կրկնօրինակել» (Copy) և «տեղադրել» (Paste) գործառույթների հեղինակ:
Տեսլերը ծնվել է 1945թ., Նյու Յորքում, սովորել է Կալիֆորնիայի Սթենֆորդի համալսարանում: Մասնագիտացել է մասնավոր ինտերֆեյսի նախագծման ոլորտում և կարիերան սկսել Xerox PARC-ում՝ 1973թ.: Նա այնտեղ Թիմ Մոտտի հետ համատեղ ստեղծել է «Կտրել» (Cut), «կրկնօրինակել» (Copy) և «տեղադրել» (Paste) հրամանները:
1980թ. Տեսլերն ընդունվել է Apple և այնտեղ աշխատել 17 տարի: Ընկերությունում զբաղեցրել է տարբեր պաշտոններ, այդ թվում՝ գիտական գլխավոր աշխատակից (Ստիվ Վոսնյակը նույնպես այդ պաշտոնը զբաղեցրել է): Տեսլերը մասնակցել է Macintoshi-ի, Lisa-յի, Newton-ի ստեղծմանը, հանդիսանում է 16 արտոնագրերի հեղինակ:
1997թ. Apple-ից հեռանալուց հետո Տեսլերը դարձել է Stagecast Software ընկերության համահիմնադիր: Նա զբաղվել է հավելվածների մշակմամբ, որոնք երեխաների համար հեշտացրել են ծրագրավորման հիմունքների ուսումնասիրությունը: Տեսլերն աշխատել է նաև Amazon-ում, Yahoo-ում, 23andMe-ում, իսկ 2009թ.-ից զբաղվել է խորհրդատվությամբ:
Մեկնաբանությունները