Հարավային ռազմական օկրուգն առաջին անգամ անօդաչու ավիացիա է կիրառել լեռներում
Հարավային Օսիայում տեղակայված ռուսական ռազմաբազան առաջին անգամ լեռնային տեղանքում կվադրոկոպտերատիպ անօդաչու ավիացիայի ներգրավմամբ զորավարժություններ է կատարել: Ուշագրավ է, որ ՌԴ զինուժը վերջին շրջանում շեշտադրում է կատարում տարբեր տեսակի ԱԹՍ-ների կիրառման վրա:
Հարավային Օսիայում տեղակայված ռուսական Հարավային ռազմական օկրուգի 58-րդ համազորային բանակի 4-րդ ռազմաբազայի ուժեղացված վաշտերն առաջին անգամ վարժանքներում կիրառել են փոքր անօդաչուներ` կվադրոկոպտերներ` լեռնային տեղանքում ոչնչացնելով պայմանական հակառակորդին:
Կվադրոկոպտերատիպ անօդաչու ավիացիան կիրառվել է վաշտային երկկողմ մարտավարական վարժանքներում, մոտ տարածություններում հետախուզական ստորաբաժանումների աջակցության, ինչպես նաև թիրախների ոչնչացման օբյեկտիվ գնահատման և մոտոհրաձգային, հրետանային և տանկային ստորաբաժանումների կրակի ճշգրտման նպատակով:
Զորավարժությունների ակտիվ փուլում ստորաբաժանման զինծառայողները համապատասխան տեխնիկայի կիրառմամբ ոչնչացրել են Կովկասի լեռներում դիրքավորված պայմանական հակառակորդին: Բացի կվադրոկոպտերներից, ռուսական զինուժը կիրառել է նաև Տ-72Ա տանկեր, հետևակի մարտական մեքենա ՀՄՄ-2, «Սանի» ականանետեր և այլ զինատեսակներ, ՀՕՊ համակարգեր:
Շեշտենք, որ ՌԴ զինուժը վերջին շրջանում շեշտադրում է կատարում տարբեր տեսակի ԱԹՍ-ների կիրառման վրա: Ուկրաինական աղբուրներն ավելի վաղ հաղորդել էին, որ Ռուսաստանի պաշտպանության նախարարությունը որոշել է մեծ քանակությամբ փոքր կվադրոկոպտերներ ձեռք բերել զինված ուժերի համար:
Մեկնաբանությունները